Shveısarıanyń Jeneva prokýratýrasy 2019-2020 jyldary Dınara Qulybaeva jasaǵan jyljymaıtyn múlik mámilelerin tekserýde.
Ol – Qazaqstannyń burynǵy prezıdenti Nursultan Nazarbaevtyń qyzy. Bul týraly Aqshamnews.kz saıty habarlaıdy.
Le Temps basylymynyń málimetinshe, Qulybaeva Jenevada jalpy quny 126 mıllıon shveısar frankin (qazirgi baǵammen 69,7 mıllıard teńge) quraıtyn úsh nysandy satyp alǵan. Qazir jergilikti quqyq qorǵaý organdary bul qarajattyń qaıdan kelgenin anyqtaýǵa tyrysýda. Qarajat aýdarylǵan shveısarıalyq REYL Intesa Sanpaolo banki de olardyń shyǵý tegine kúmánmen qarap otyr.
Dınara Qulybaeva buǵan deıin de Shveısarıada qymbat jyljymaıtyn múlikke ınvestısıa salǵan. 2009 jyly ol Jenevadaǵy Anere qalashyǵynan 74,7 mıllıon frankqa (sol ýaqyt úshin rekordtyq soma) sándi saraı satyp alǵan. Al 2019 jyly Shveısarıada turaqty turýǵa ruqsat alǵannan keıin, jyljymaıtyn múlikke iri kólemde qarajat quıa bastady.
Qulybaeva satyp alǵan eń qundy nysandardyń biri – 1666 jyly Savoııa gersogi Karl-Emmanýıl II úshin salynǵan Belrıv saraıy. Ol 2022 jyly 106 mıllıon frankqa (58,6 mıllıard teńge) baǵalandy. 2023 jyly bul tarıhı ǵımarat Jeneva kantony úshin asa mańyzdy mádenı mura mártebesine ıe boldy.
Belrıv saraıynan bólek, Qulybaeva kórshi jer telimin de 44 mıllıon frankqa satyp alǵan. Qazir bul aýmaqta onyń Montes Alti qaıyrymdylyq qorynyń shtab-páteri ornalasqan. Jalpy alǵanda, 2019 jyldyń tamyzynan 2020 jyldyń shildesine deıin ol Jeneva mańynda 62 myń sharshy metr elıtalyq jyljymaıtyn múlikke ıelik etken.
Alǵashynda bul mámileler Shveısarıa bıliginiń kúdigin týdyrmaǵan. Alaıda keıingi ýaqytta olardyń zańdylyǵy qaıta qarala bastady. Qulybaevanyń advokaty onyń barlyq qarajaty zańdy jolmen kelgenin málimdedi.