Almaty qalasynyń bilim basqarmasy habarlaǵandaı, QR Oqý-aǵartý mınıstrligi mektepterdi jańartý boıynsha biryńǵaı jospardy bekitti.
Medeý aýdanynda 46 jyl buryn salynǵan №30 mektep-gımnazıasy ashylǵannan beri kúrdeli jóndeýden ótpegen. Búginde rekonstrýksıalaý jumystaryn bastaý úshin barlyq daıyndyq sharasy aıaqtaldy, merdiger kompanıa tańdaldy, dep habarlaıdy aqshamnews.kz.
Qurylys-montajdaý jumystary osy jyldyń naýryz aıynda bastalady. 2026-2027 oqý jylyna deıin oqýshylarǵa jaıly jaǵdaı jasaý josparlanyp otyr. Kúrdeli jóndeý jumystaryn bastaý týraly túpkilikti sheshim qabyldamas buryn barlyq bilim berý úderisine qatysýshylar men ata-analar aldyn ala qulaǵdar etiledi.
Qazirgi ýaqytta mektepte 1067 oqýshy oqıdy. Oqý úderisi qalypty rejımde, sabaqtar ýaqytyly ótip jatyr.
11 aqpanda Medeý aýdanynyń bilim bólimi men Almatynyń bilim basqarmasy ótkizgen jalpy mekteptik ata-analar jınalysynda mektepti jańartý jobasy týraly tolyq aqparat berildi. Ata-analar kókeıde júrgen suraqtar qoıyp, usynys bildire aldy.
Oqýshylarǵa úzdiksiz bilim berý úshin mektep ákimshiligi men bilim basqarmasy oqýshylardy Medeý aýdanyndaǵy basqa bilim berý mekemelerine bólý týraly kelisimge keldi:
· «№77 jalpy bilim beretin mektep» KMM - 414 oqýshy;
· «№ 47 jalpy bilim beretin mektep» KMM - 326 oqýshy;
· «№56 Gımnazıa» KMM - 210 oqýshy;
· «M. Mámetova atyndaǵy «№28 mektep-lıseıi» KMM - 117 oqýshy.
Buǵan qosa, oqýshylardyń qaýipsizdigin qamtamasyz etý úshin barlyq qajetti shara qabyldandy: qajet bolǵan jaǵdaıda olardy mektepterge avtobýstarmen tasymaldaý uıymdastyrylady.
№30 mektep-gımnazıasynyń jańartý jumystary aıaqtalǵannan keıin oqýshylar zamanaýı ári jaıly oqý jaǵdaıynda bilim alady. Jańartý jobasy aıasynda:
- mektep ǵımaratynyń kúrdeli jóndeýi;
- zamanaýı pándik kabınettermen jabdyqtaý;
- mektep jıhazyn jańartý;
- kitaphana men asqanany jańǵyrtý;
- sport zalyn qaıta qurý;
- qaýipsizdik júıelerin ornatý.