Raıymbek aýdanyndaǵy jalǵyz aýdandyq aýrýhanaǵa kúrdeli jóndeý jasalmaǵan
Almaty oblysy Narynqol aýylynyń turǵyndary saýatty medısına mamandarynyń joǵyn aıtady. Aýyl turǵyndary syrqatymyzǵa em surap barsaq, dárigerler uıaly telefonǵa qarap oqyp beredi deıdi. Odan bólek, 40 myń halqy bar Raıymbek aýdanyndaǵy jalǵyz aýdandyq aýrýhanaǵa áli kúrdeli jóndeý jasalmaǵan, dep habarlaıdy Almaty-akshamy.kz Almaty arnasyna silteme jasap.
«Áıteýir dıagnozdy uıaly telefonǵa qarap qoıady. Ózderi aýrýdy taba almaıdy ǵoı. Oqymaǵan, túk bilmeıdi. Oqyǵan bilimi jetetinder kelse ǵoı», – dedi Narynqol aýylynyń turǵyny Álibek Dáldenbaev.
Turǵyndardyń aıtýynsha, aýylǵa kelgen mamandarǵa jaǵdaı jasalmaıdy. Sol sebepti bilikti maman joq.
«Jastar meıirbıkeniń oqýyn oqyp keledi. Al dárigerlerdiń sany shekteýli. Meniń anamnyń ózi aýrýhanada isteıdi. Saýatsyz dárigerler de bar dep aıtyp jatady. Sol úshin aýylǵa saýatty maman kerek, olarǵa jaǵdaı jasaý kerek», – dedi Narynqol aýylynyń turǵyny Ásel Sovetbaı.
Aýyl jurty aryzyn aıtqan Raıymbek aýdandyq ortalyq aýrýhanasynyń ahýaly syn kótermeıdi. Turǵyndardyń aıtýynsha, 1989 jyly salynǵan bul medısınalyq mekemege áli kúnge kúrdeli jóndeý jasalmaǵan. Eldiń em-domyna jarap turǵan eski emhananyń qazirgi jaǵdaıyn ondaǵy qyzmetkerler de jasyrmaıdy. Jaýyn jaýsa tóbeden sý tamshylap, jel soqsa shatyry ushady eken.
«Jańbyr bolǵan kezde anaý 3-4 qabatty sý basyp ketedi. Men hırýrgıa bóliminde isteımin ǵoı. Sý tamshylaıdy. İshine deıin kiredi. Baspaldaqtarǵa shelek qoıyp qoıady», – dedi SHJQ «Raıymbek aýdandyq aýrýhanasy» KMK hırýrgıa bóliminiń qyzmetkeri Janar Aqbaeva.
«Terapevt, hırýrg, gınekolog kelse jetkilikti dep oılaımyn. Joq, jalaqy az emes, múmkin, kelgen mamanǵa úı berý kerek shyǵar. Jastardyń aýylǵa turǵysy kelmeıdi ǵoı. Jóndeý jumystary jasalady degen, biraq áli jasalǵan joq. Al mamandardyń bilimine kelsek, bári bilimdi dep oılaımyn», – dedi SHJQ «Raıymbek aýdandyq aýrýhanasy» KMK bas meıirbıkesi Nazgúl Merjanova.
Almaty oblysynyń ákimi Marat Sultanǵazıevtiń Raıymbek aýdanyna issappary barysynda atalǵan aýdandaǵy 1 aýrýhana men 5 dárigerlik ambýlatorıanyń kúrdeli jóndeýdi qajet etetini aıtylǵan edi. Oblys basshysy jaǵdaıdy kózben kórip, tıisti taraptarǵa tapsyrma bergenin atap ótti.