Qazaqstannyń basym bóliginde naızaǵaı oınaıdy, kún ystyq bolady
11 tamyzda Qazaqstannyń 9 óńirinde daýyldy eskertý jarıalandy. Sınoptıkter naızaǵaı oınap, jańbyr jaýady, keı jerde aptap ystyq bolatynyn eskertedi, dep habarlaıdy Almaty-akshamy.kz.
Sınoptıkterdiń málimetinshe, 11 tamyzda Soltústik Qazaqstan oblysynyń ońtústiginde, shyǵysynda naızaǵaı oınap, burshaq túsedi dep kútiledi. Túnde jáne tańerteń oblystyń batysynda tuman túsetini boljanady. Kúndiz oblystyń ońtústiginde soqqan jeldiń ekpini 15-20 m/s jetedi.
Tańerteń jáne kúndiz Túrkistan oblysynyń taýly aýdandarynda naızaǵaı oınap, kún kúrkireıdi dep kútiledi. Soltústik-shyǵystan soqqan jel tańerteń jáne kúndiz taýly asýlarynda 15-20 m/s quraıdy, oblystyń ońtústiginde, shyǵysynda tótenshe órt qaýpi saqtalady.
Batys Qazaqstan oblysynda kúndiz aýa temperatýrasy 37 gradýsqa jetedi, Atyraý oblysynda da 37 gradýs aptap ystyq kútiledi. Óńirdiń soltústiginde, sondaı-aq Qyzylorda oblysynda tótenshe órt qaýpi saqtalady. Aqtóbe oblysynda da ystyq bolady, synap baǵany 36 gradýsqa deıin kóterilýi múmkin.
Sınoptıkterdiń boljamynsha, túnde Qaraǵandy oblysynyń soltústiginde tuman túsedi, soltústik-shyǵystan jel soǵady, naızaǵaı kezindegi ekpini 15-20 m/s jetýi múmkin.
Jetisý oblysynyń shyǵysynda jáne taýly aýdandarynda búgin, 10 tamyzda naızaǵaı oınaıdy dep kútiledi. Batystan 15-20 m/s jyldamdyqpen jel soǵady, keı tusta 25 m/s jetedi.
11 tamyzda kúndiz Abaı oblysynyń soltústiginde nóser jańbyr jaýady. Oblystyń basym bóliginde naızaǵaı oınap, óńirdiń batysy men ońtústiginde burshaq túsedi dep kútiledi. Soltústik-batystan soqqan jeldiń ekpini kúndiz oblystyń batysy men ońtústiginde 15-20 m/s quraıdy.