2022 jyly qumar oıyndardy uıymdastyrý jáne bás tigý boıynsha qyzmetter kólemi 553,6 mlrd teńge bolǵan.
Bul statısıka 12 sáýir kúni Májilistiń jalpy otyrysynda Premer-mınıstrdiń orynbasary Altaı Kólginovke joldanǵan depýtattyq saýalda keltirildi, dep habarlaıdy Almaty-akshamy.kz Egemen.kz-ke silteme jasap.
AMANAT partıasynyń «Qoǵamdyq saıasat ınstıtýty» jasaǵan áleýmettik zertteýde halyqtyń 73,7 paıyzy lýdomanıaǵa qatty alańdaýly ekenin jáne býkmekerlik keńselerdiń jumysyna qatań tyıym salý qajettigin aıtqan.
«Búgingi tańda býkmekerlik keńseler halyqty qumar oıyndarǵa barynsha kóp tartýǵa mıllıondaǵan teńge jumsap otyr. Elimizdiń jetekshi tele-radıo arnalary sport taranslıasıalary kezinde býkmekerlik keńselerdi jarnamalaýda. Qoǵamdyq oryndardaǵy lotereıa termınaldaryn jaýapty organdar baqylamaý sebebinen býyny qatpaǵan bútin bir urpaq sol temir termınaldardyń qursaýynda júr», - dedi Janarbek Áshimjan.
Osy oraıda depýtat qaryzǵa qaryz jamap, qumar oıyn úshin shaǵyn nesıe alyp oınaıtyndardyń qatary kóbeıgenin alǵa tartty.
«El bolamyn deseń, besigińdi túze» deıdi. Besigimiz – jastar! Al jastarymyz esigi aıqara ashyq qumar oıyndardyń oshaǵyndaǵy otqa jylynyp júr. Qumar oıyn degenimiz – qyp-qyzyl ot! Ol ot búgin urpaǵymyzǵa aýyz salsa, erteń qoǵamymyzdy órtke oraıdy», - dep oıyn jetkizdi Janarbek Áshimjan.
Depýtattar Úkimetten myna naqty is-sharalardy jedel túrde qolǵa alýyn talap etti:
- Qoldanystaǵy nesıe boıynsha 3 aıdan astam ýaqyttan beri tólem jasaı almaǵan tulǵalardan onlaın jáne oflaın bás tigýdi qabyldaýǵa qatań tyıym salý kerek.
- Qarjy pıramıdalaryn, onlaın-kazınolardy jáne basqa da qumar oıyndardy jarnamalaý zańmen qýdalaný kerek.
- Sýpermarketter men qoǵamdyq oryndarda samsap turǵan «Lotomatic» sekildi ártúrli lotereıa termınaldaryn ornatýǵa jáne lotereıa bıletterin taratýǵa qatań tyıym salý kerek.