Depýtattar memlekettik grantpen oqıtyn stýdentterge mindetti synaqty engizýdi usynyp otyr, dep habarlaıdy aqshamnews.kz.
«Búginde biz otandyq ekonomıkany damytý úshin jumysqa ornalasýdyń ornyna shetelde qara jumysty tańdaıtyn tehnıkalyq jáne joǵary bilimi bar mamandardy daıyndap jatyrmyz», - dep atap ótti Májilis depýtaty Islam Suńqar depýtattyq saýalynda.
Jalpy, Halyqaralyq kóshi-qon uıymynyń 2023 jylǵa arnalǵan málimeti boıynsha 193 myń qazaqstandyq eńbek mıgranttary bolyp tabylady.
Eńbek mınıstrliginiń málimeti boıynsha, 2024 jyly qurylys salasy ekonomıkanyń eń mańyzdy salalarynyń biri boldy. Al dál osy salada kadr tapshylyǵy 15 myń adam, aýyl, orman jáne balyq sharýashylyǵy – 13,5 myń, kólik jáne qoıma sharýashylyǵy – 9,4 myń, óńdeýshi ónerkásip – 7,4 myń kadr tapshylyǵy seziledi.
Ol 2019 jyly qurylysshylardy daıyndaıtyn joǵary oqý oryndaryna 2900 grant, aýyl, orman jáne balyq sharýashylyǵyna 1,6 myń, kólik jáne qoıma sharýashylyǵyna 4,2 myń jáne t.b. grant bólingeni jaıynda toqtalyp ótti.
«Bizdiń oıymyzsha, 2019 jyly oqýǵa túsken mamandar 2023 jáne 2024 jyldardaǵy bos oryndardy toltyrýy kerek edi. Alaıda, biz muny kóre almaı otyrmyz. Jyl saıyn memlekettik bilim berý granttary bólinse de, kadr tapshylyǵy azaımaı otyr. Kerisinshe, tapshylyq odan saıyn ulǵaıyp barady. Onda búdjet qarajatyn kadrlardy daıarlaýǵa jumsaýdyń tıimdiligi qandaı?», - dep atap ótti depýtat.
QHP fraksıasy memlekettik tapsyrys negizinde bilim alǵan azamattardy menshik nysanyna qaramastan tıisti salada beıini boıynsha mindetti oqytýdy engizýdi usynady.