Teńiz jaıaý áskerleri brıgadasynyń 500-den astam sarbazy Jaýyngerlik týmen qoshtasty.
Atyraý oblysyndaǵy sý tasqyny saldaryn joıýǵa qatysqan 300-den astam sarbaz Qorǵanys mınıstriniń atynan qol saǵattarymen marapattaldy. Qyzmettik mindetterin adal atqarǵany jáne úlgili áskerı tártibi úshin birqatar áskerı qyzmetshilerdiń ata-analaryna alǵys hattar joldandy. Jekelegen sarbazdarǵa kezekti áskerı ataq berý de mańyzdy sát boldy, dep habarlaıdy aqshamnews.kz Qorǵanys mınıstrligine silteme jasap.
Teńiz jaıaý áskerleri brıgadasynyń komandıri podpolkovnık Azamat Súleımenov bir jyl ishinde áskerı qyzmetshilerdiń áskerı mamandyqty meńgergenin, olardyń kópshiligi jaýyngerlik jáne memlekettik-quqyqtyq daıyndyqta tamasha nátıjege qol jetkizgenin atap ótti.
– Sizder «Birlestik-2024» halyqaralyq oqý-jattyǵýlaryna, kóktemgi sý tasqyny saldaryn joıýǵa qatystyńyzdar. Azamattardyń qaýipsizdigin qamtamasyz etýge, olardy evakýasıalaýdy uıymdastyrýǵa jáne gýmanıtarlyq kómek jetkizýge óz úlesterińizdi qosa bildińizder, – dedi brıgada komandıri.
Qatardaǵy jaýynger Beıbarys Seıitqasym áskerdegibir jylǵy qyzmeti týraly óz áserin ortaǵa salýdy da umytpady.
– Ásker bizge kóp nárseni úıretti. Komandırlerge zeıini men shydamdylyǵy, áskerı isti ıgerýge kómekteskeni úshin alǵys aıtqym keledi. Biz muny eshqashan umytpaımyz ári joǵary baǵalaımyz, – dedi ol.
Sonymen birge 37 teńiz jaıaý áskeriniń kelisimshart boıynsha qyzmet etýge sheshim qabyldaǵanyn da aıta ketý kerek. Zapasqa shyǵarylǵan 60-tan astam áskerı qyzmetshi bilim berý jeńildikterin paıdalanýǵa jáne joǵary oqý ornyna oqýǵa túsýge nıet bildirdi.