Sońǵy ýaqytta elimizde halyq qalaýlylaryna qatysty aqparattyq shabýyl jasaý úrdiske aınalyp ketkendeı.
Budan buryn Dáýlet Turlyhanovtyń uldaryna qatysty vıdeolar jelide tarap, sportshyny bala tárbıesi úshin kinálaǵandar boldy.
Sonymen qatar jer daýyna belsene aralasyp júrgen zańger depýtat Baqytjan Bazarbektiń sábıiniń koláskasyn órtep jibergenin de jazǵanbyz.
Endi eń tómengi jalaqy mólsherin kóbeıtý týraly aıtqan Rınat Zaıytovty depýtattyq mandatynan aıyrý jaıynda petısıaǵa qol jınalyp jatyr, dep habarlaıdy Almaty-akshamy.kz tilshisi.
Daýdyń basy Rınat Zaıytovtyń «Adyrna» ulttyq portalyna bergen YouTube arnasyndaǵy suqbattan bastaldy.
Onda Rınat Zaıytov Qazaqstanda alaıaqtyqtyń 80 paıyzyn namazhandar jasaıdy degen bolatyn.
Petısıaǵa qol jınaýshylar Rınat Zaıytovtyń bul sózin Qazaqstan Respýblıkasy azamattarynyń ar-namysy men qadir-qasıetine negizsiz nuqsan keltirip, Qazaqstan Respýblıkasy azamattarynyń konstıtýsıalyq quqyqtaryna nuqsan keltirý, qorlaý jáne buzý arqyly jalpyhalyqtyq rezonans týdyrdy dep otyr.
Petısıaǵa qol jınaǵan Alash.online portaly Qazaqstanda «ózin musylman sanaıtyn jáne ár juma saıyn juma namazyn oqıtyn 15,6 mıllıonnan astam azamat bar» degen derek keltiripti. Portaldyń jazýynsha, «Rınat Zaıytovtyń anyqtamasyna senseńiz, Qazaqstan Respýblıkasynyń 15,6 mıllıon azamaty alaıaqtyq áreketter jasaıdy, bul shyndyqqa saı kelmeıdi».
Al Statısıka agenttiginiń saıtynda jarıalanǵan 2021 jylǵy halyq sanaǵynyń qorytyndysy boıynsha elimizdegi 19 186 015 adamnyń 13 297 775-i musylman dininde dep kórsetilgen. Biraq bul 13 mıllıonnan astam musylmannyń bárin birdeı namazhan dep aıta almaımyz. Munyń ishinde balalar men namaz oqýǵa densaýlyǵy jaramaıtyn azamattar da bolýy ábden múmkin. Sondyqtan portalda jazylǵan «15,6 mıllıon namazhan azamat» degen san ásireleý emes pe degen kúdik týdyrady jáne juma namazǵa barǵan jamaǵattyń bárin namazhan deýge bolar ma eken? Jalpy depýtattarǵa jasalǵan aqparattyq shabýyldyń artynda syrtqy kúshterdiń múddesi turǵan joq pa?