Olar 12 jeltoqsandy Alash Respýblıkasynyń qurylǵan kúni retinde bekitýdi usyndy.
Sonnymen qatar «Aq jol» fraksıasy bul kúndi jyl saıyn memlekettik deńgeıde atap ótýdi surady, dep habarlaıdy Almaty-akshamy.kz
Májilis depýtaty Berik Dúısenbınov Qazaq handyǵy 1847 jyly memleket retinde tarıh sahnasynan ketkennen keıin araǵa týra 70 jyl salyp, 1917 jyly jeltoqsanda sol Qazaq handyǵynyń jer aýmaǵynda Alash ult-azattyq qozǵalysy zamanaýı Qazaq ulttyq memleketiniń irgetasyn qaıta kótergenin eske saldy. Sol jyldyń 5-12 jeltoqsanynda Orynbor qalasynda ótken Ekinshi jalpyulttyq qazaq-qyrǵyz quryltaıynda Alashorda ulttyq keńesin jasaqtap, kópshilik daýyspen Alash Respýblıkasy Úkimetiniń tóraǵasy bolyp Álıhan Bókeıhanov saılandy.
Depýtat bıyl Alash Respýblıkasynyń qurylǵanyna 105 jyl tolǵanyn aıtty. Ókinishke qaraı, bul tarıhı data taǵy da ataýsyz qaldy.
«Búginde tarıhı ádildikti ornatatyn kún jetti dep sanaımyz. Tarıh taǵylymyn urpaqqa nasıhattaý maqsatynda «Aq jol» fraksıasy alashtanýshy ǵalymdardyń bastamasyn qoldaı otyryp, Táýelsizdik kúni qarsańyndaǵy 12 jeltoqsandy – tarıhı qujattarmen dáleldengen Alash Respýblıkasynyń qurylǵan kúni retinde «Alash kúni» dep resmı belgileýdi jáne jyl saıyn memlekettik deńgeıde atap ótýdi suraıdy», - dedi Dúısenbınov.