Depýtat Ermurat Bápı Májilis otyrysynda Ulttyq qarý-jaraq mýzeıin ashýdy usyndy, - dep habarlaıdy aqshamnews.kz.
Depýtattyq saýalyn ol qorǵanys mınıstri Rýslan Jaqsylyqovqa joldady.
"Eldiń táýelsizdigin tanytatyn resmı rámizder – Tý, Eltańba, Elurannan basqa da mańyzdy qosymsha atrıbýttar bar. Máselen, Ulttyq mýzeı, Ulttyq Akademıa, Ulttyq kitaphana, Ulttyq teatr, t.t. Eldiń biregeıligin jáne jas urpaqty patrıottyq pen ata-babalar erligi rýhynda tárbıeleý maqsatynda teńdessiz tanym ortalyǵy – bul Ulttyq qarý-jaraq mýzeıi nemese Ulttyq qarý-jaraq palatasy bolar edi", - dedi ol.
Ol qaı elderde mundaı mýzeı baryn aıtty.
"Fransıada Orta ǵasyrdan bergi áskerı tarıhtyń kýási – Parıj áskerı mýzeıi bar. Londondaǵy Koróldik qarý-jaraq palatasy men Imperıalyq áskerı mýzeıi brıtandyq eldik pen erliktiń eren úlgisin pash etedi. Sol sıaqty, Reseıde Kremldiń qarý-jaraq palatasy álemge áıgili. Kórshiles Ózbekstanda Ámir Temir murajaıynyń bir bóligi qarý-jaraqqa arnalǵan. Bakýdegi Ázirbaıjan kóshpendiler mýzeıi Túrki mádenıetiniń qarý-jaraǵyn dáripteý ortalyǵy sanalady", - deıdi Bápı.
Onyń aıtýynsha, táýelsiz Qazaqstanda mundaı ulttyq naqyshtaǵy qarý-jaraq mýzeıi atymen joq.
"Osyndaı suraqtardyń negizinde, sizderden Qazastanda Ulttyq qarý-jaraq mýzeıin ashý qajettigi jónindegi múmkindikterdi baǵamdap, Parlament depýtattaryna tujyrymdy jaýap berýdi suraımyn. Bul jaýap reseılik mýzeıdiń fılıalyna baılanysty týyndaǵan qoǵamdaǵy qajetsiz qozǵalystyń býyn basýǵa yqpal etýi tıis dep esepteımin!" - deıdi ol.