Almatyda shomylý maýsymy men jazǵy demalys bastalmaı jatyp balalardyń qaýipsizdigin qamtamasyz etýdi kúsheıtti, dep habarlaıdy aqshamnews.kz.
Qalalyq Tótenshe jaǵdaılar departamenti azamattyq qorǵanys basqarmasynyń aǵa ofıseri Esbol Sultanov Almaty qalasy óńirlik komýnıkasıalar qyzmetinde osylaı dedi.
Tótenshe jaǵdaılar departamentiniń ókili atap ótkendeı, Almaty qalasy men taýǵa jaqyn aýdandarda 44 sý aıdyny bar, olardyń 9-y sýǵa túsýge qaýipti.
«Oqys oqıǵanyń aldyn alatyn 25 jáne uıymdastyrý jaǵyn qamtıtyn «Mamyr qaýpi» is-sharalar jospary ázirlenip, iske asyrylyp jatyr», – dedi Esbol Sultanov.
2024 jyldan bastap qaýipti sanalatyn jeti ýchaskege ıntellektýaldy beınebaqylaý kameralary ornatylǵan. Olardyń beınesi naqty ýaqytta qutqarý qyzmetteriniń kompúteri men qyzmetkerlerdiń mobıldi qurylǵylaryna jiberiledi. Bular sýdaǵy tártipti buzǵan jaǵdaıda jedel áreket etýge múmkindik bermek.
Sonymen qatar, Halyqaralyq balalardy qorǵaý kúni aıasynda 28 panfılovshylar saıabaǵynda «Bala qaýipsizdigi – basty maqsatymyz» uranymen aldyn alýǵa baǵyttalǵan aýqymdy is-shara ótip jatyr. Onyń maqsaty – balalarǵa kúndelikti ómirge kerek ádepti negizderin úıretý, bilim berip, daǵdysyn qalyptastyrý, sondaı-aq qutqarýshylardyń jumysyn, arnaýly tehnıka men jabdyqtardyń múmkindigin kórsetý.
Jaz bastalǵaly beri Almatyda polısıa, qutqarýshylar men eriktiler reıd júrgize bastady. Sý aıdyndarynda tártipti buzǵan 6 adam jaýapqa tartylǵan. Sonymen qatar, buqaralyq aqparat quraldary, saýda ortalyqtary, HQKO, kınoteatrlar, metro men adam kóp jınalatyn basqa jerlerde de aqparattyq-túsindirme jumystary júrgizilip jatyr.
Almaty TJD qala turǵyndary men qonaqtaryn tyıym salynǵan jerde shomylmaýǵa, saqtyq sharasyn saqtap, myna erejeni eskerip júrýge shaqyrdy:
balalardy sýdyń janynda qaraýsyz qaldyrmaý;
júze almasańyz belden joǵary sýǵa túspeý;
jaǵadan alys ketpeý;
qaıyqtan, kópirden, aılaqtan sýǵa sekirmeý;
túnde shomylmaý;
sýburqaqtarda da shomylýǵa bolmaıdy.