Májilis depýtaty Sergeı Ponomarev palatanyń jalpy otyrysynda Almaty qalasynyń ekologıalyq ahýalyn jaqsartýdyń jolyn usyndy, dep habarlaıdy aqshamnews.kz
- Men Májilis qabyldaǵan «Akvamádenıet týraly» Zań jobasynyń jumys tobyna jetekshilik ettim. Almatydaǵy ekologıalyq qaterge taǵy da nazar aýdarǵym keledi. Súıikti qalamyzda aýa sapasynyń nasharlaǵany sonshalyq, almatylyqtar megapolıstiń qasiretine nazar aýdartý úshin qalany shańsorǵyshpen «tazalap» jatyr, - dedi Sergeı Ponomarev.
Depýtat bul máseleniń sheshimin elektromobılderdiń qoldanys aıasyn keńeıtýden kórip otyr.
- Meniń oıymsha, qaladaǵy bul máseleni elektromobılderdiń kómegimen sheshýge bolady. Memlekettik uıymdar men kvazımemlekettik sektordy elektromobılderge otyrǵyzý kerek. Almaty ákimdigine elektr qozǵaltqyshy bar qoǵamdyq kóliktiń úlesin arttyrý kerek. Búkil taksı men avtokólikterdi elektr jelisine aýystyrý qajet, - dedi ol.