QR densaýlyq saqtaý mınıstrligi Onkologıamen kúres boıynsha 2023-2027 jyldarǵa arnalǵan Keshendi jospar sheńberinde el óńirlerinde sáýlemen emdeýge baǵyttalǵan jabdyqtar parkin jańartýda.
Atom energıasy jónindegi Halyqaralyq agenttik (AEHA) usynymdaryna sáıkes sáýlemen emdeý onkologıalyq aýrýlary bar naýqastardyń 60-70%-yn qamtýy kerek. Qazaqstanda bul kórsetkish 30,6%-ǵa teń, dep habarlaıdy aqshamnews.kz QR Densaýlyq mınıstrligine silteme jasap.
Ómirlik qajetti terapıaǵa qoljetimdilikti arttyrý úshin "Qazaqstan halqyna" qaıyrymdylyq qorymen birge 16 zamanaýı jelilik jedeldetkish satyp alyp, ornatý týraly másele qaralýda. Bul naýqastardy emdeýmen qamtý deńgeıin aıtarlyqtaı arttyrýǵa jáne ony halyqaralyq standarttarǵa jaqyndatýǵa septik etedi.
Búgingi tańda elimizde 10 óńirde jumys isteıtin 15 jelilik jedeldetkishti qosa alǵanda sáýlemen emdeýge arnalǵan 32 apparat qoıylyp úlgerdi. Qazirgi ýaqytta Almaty, Astana qalalary men Abaı, Soltústik Qazaqstan jáne Qaraǵandy oblystary sıaqty óńirlerde jańa jabdyqtardy ornatý aıaqtaldy. Jańa qondyrǵylar arasynda baptaýlary jasalǵan, Qazaq onkologıa jáne radıologıa ǵylymı- zertteý ınstıtýty men Astanadaǵy Kópfýnksıonaldy medısınalyq ortalyǵy sıaqty jetekshi medısınalyq mekemelerge berýge daıyndalyp jatqan Ethos Varian jáne TrueBeam Varian degen zamanaýı medısınalyq jedeldetkishter bar.
Sonymen qatar el aýmaǵynda ár túrli óńirlerde ornalasqan 7 PET-ortalyq jumys isteıdi, bıyl Almatyda bireýi shaǵyn sıklotronmen jabdyqtalǵan taǵy eki jeke PET-ortalyq jumysyn bastady.
3D-konforly sáýle terapıasy, qarqyndy modýldenetin terapıa (IMRT VMAT) jáne stereotaksıkalyq radıohırýrgıa sıaqty eń jańa ádisterdi engizýdiń arqasynda emdeý anaǵurlym naqty jáne tıimdi bola túsedi. Bul tehnologıalar janama teris áserdi azaıtyp, pasıentterdiń ómir sapasyn arttyrady. Soǵan qosa jańa ádisterdiń arqasynda emdeý kýrsynyń uzaqtyǵy qysqaryp, onyń tıimdiligi isiktiń túri men ornalasqan jerine qaraı artady.
Desek te, Almaty, Aqmola, Túrkistan, Ulytaý sıaqty basqa da oblystarda áli de bolsa sáýlemen emdeýge qajet jabdyqtar joq. Búginde "Qazaqstan halqyna" qory 2025 jylǵa deıin 5 jelilik jedeldetkish satyp alý týraly sheshim qabyldady. Qordyń bul qoldaýy emdeýdiń zamanaýı ádisterine qoljetimdilikti arttyryp, eldegi medısınalyq kómek sapasyn jaqsartýǵa yqpal etedi.
Densaýlyq saqtaý mınıstrligi onkologıalyq aýrýlarmen kúresý jáne ólim-jitimdi azaıtý úshin jabdyqtardy jańǵyrtý jáne jańa tehnologıalardy engizý isin jalǵastyra beredi.