Almatylyq talapker Medına Maısar ǵylym jáne joǵary bilim mınıstrligin sotqa berdi.
Medına Maısar joǵary bal alsa da, grantqa túspeı qalǵanyna, al odan tómen alǵandar grantqa iligip ketkenine narazy, dep habarlaıdy aqshamnews.kz.
"Keshe birinshi talapker ǵylym mınıstrligine ákimshilik shaǵym túsirdi. Ókinishtisi, mınıstrlik áli kúnge deıin óz qatesin moıyndamaı, zańǵa qaıshy kelip, tótenshe kvota engizýge quqyǵy bardaı syńaı tanytyp otyr", – deıdi zańger Halıda Ájiǵulova.
Onyń aıtýynsha, mektep bitirip, memlekettik grantqa ıe bola almaı qalǵan 200-den astam bala kómek surap kelgen.
İs áli sotqa jetken joq. Ájiǵulova ondaǵan balanyń sotqa shaǵymdanýǵa nıetti ekenin atap ótti. Osyǵan deıin Medına Maısar prezıdentke úndeý joldap, ǵylym jáne joǵary bilim mınıstri Saıasat Nurbekti qyzmetinen bosatýdy suraǵan edi.
Mınıstrlik arnaıy baılanys ortalyǵyn iske qosty. Onda qosymsha bilim granttary týraly barlyq qajet aqparatty ala alasyz. 10 myń granttyń 3 myńyn elimizdiń jetekshi joǵary oqý oryndary, 2 myńǵa jýyǵyn jumys berýshiler men "Qazaqstan halqy" qory, qalǵanyn oblys ákimdikteri bóledi. Sodan keıin mınıstrlik taǵy 10 myń grant bóletinin málimdedi.
Eske salsaq, jelide túlekter JOO-ǵa túsý grantynyń basym bóligi sý tasqynynan zardap shekkenderge berilgenine qarsy shyqqan edi. Olar petısıa jarıalap, mınıstrlikti sotqa berdi.