Úkimette Densaýlyq saqtaý ınfraqurylymyn damytýdyń 2024-2030 jyldarǵa arnalǵan tujyrymdamasy qabyldandy, dep habarlaıdy almaty-akshamy.kz
Tujyrymdamany iske asyrý densaýlyq saqtaý ınfraqurylymy nysandarynyń tozýyn 30%-ǵa deıin, úlgilik emes (beıimdelgen nysandardyń) úlesin 25%-ǵa deıin tómendetýge, medısınalyq nysandardyń jaraqtandyrylýyn 88%-ǵa deıin ulǵaıtýǵa jáne olardy normatıvterge sáıkes bilikti medısına kadrlarymen qamtamasyz etýge múmkindik beredi. Bul týraly QR Úkimetiniń otyrysynda densaýlyq saqtaý mınıstri Aqmaral Álnazarova málimdedi.
Búginde Qazaqstanda 7 337 memlekettik densaýlyq saqtaý nysany medısınalyq qyzmet kórsetedi: 663 – stasıonarlyq, taǵy 6 674 – alǵashqy medısınalyq-sanıtarlyq kómek nysany. Sońǵy 5 jylda 400-den astam densaýlyq saqtaý nysany salyndy jáne 4000-nan astam densaýlyq saqtaý nysany jóndeldi. 261 mlrd teńgege medısınalyq jabdyqtar satyp alyndy. Alaıda, tozýdyń joǵary deńgeıi ózekti másele bolyp qalyp otyr.
Tujyrymdama sheńberinde ınfraqurylymdy josparlaý prosesi uzaq merzimdi demografıalyq boljamdarǵa, syrqattanýshylyq kórsetkishterine jáne halyq qurylymyna negizdeletin bolady. Tósek-oryn qoryn qaıta qurylymdaý jáne densaýlyq saqtaý ınfraqurylymyn normatıvterge sáıkes keltirý jónindegi is-sharalar júrgiziledi.
Naqty ýaqyt rejıminde utymdy josparlaýdy, baqylaýdy jáne monıtorıńti júzege asyrýǵa múmkindik beretin densaýlyq saqtaý ınfraqurylymynyń sıfrlyq kartasy ázirlenetin bolady.
Tujyrymdamany iske asyrýdyń 1 kezeńi densaýlyq saqtaýdyń negizgi júıe quraýshy nysandaryn jobalaýdy aıaqtap, qurylysyn bastaýdy qamtıdy. Bul 11 440 tósek-oryndyq 34 negizgi jobalar. Aımaqtar zamanaýı kópsalaly mekemelermen qamtamasyz etiledi: 6 ýnıversıtettik klınıka, 14 aýrýhana, 11 perınataldyq jáne 3 ulttyq ortalyq. Sondaı-aq densaýlyq saqtaýdyń basqa da obektilerin kúrdeli jóndeý jáne jaraqtandyrý jumystary jalǵastyrylady.
2 kezeńde jańa qurylys, jóndeý jáne qosymsha jaraqtandyrý jolymen 2,5 myń medısınalyq nysandy jańǵyrtýdy jalǵastyrý kózdelgen.
Tujyrymdama sheńberinde balalarǵa mamandandyrylǵan jáne shuǵyl kómek kórsetetin tósek-oryndarynyń tapshylyǵyn jabý jónindegi sharalar da pysyqtalatyn bolady. Onyń ishinde 200 tósek-oryndyq balalar onkologıasy jáne gematologıa ortalyǵynyń, 200 tósek-oryndyq balalar hırýrgıasy ortalyǵynyń, Astanadaǵy Ulttyq shuǵyl medısınany úılestirý ortalyǵynyń janyndaǵy 200 tósek-oryndyq balalar korpýsynyń, sondaı-aq Almatydaǵy Inovasıalyq hırýrgıa ortalyǵynyń qurylysy qarastyrylǵan.