"ANA ÚIİ" QQ agenttiginiń maqsaty -Qazaqstandyq qoǵamda qabyldaýshy otbasylardy kásibı daıarlaý, súıemeldeý jáne bala asyrap alý mádenıetin damytý, dep habarlaıdy almaty-akshamy.kz.
Agenttiktiń elimizdiń 20 qalasynda keńes berý kabınetteri jumys isteıdi. Qor mamandary óz otbasylaryna balalar úıleri men jetimder úılerinen balalardy qabyldaǵysy keletin azamattarǵa (otbasylarǵa) konsýltasıalyq kómek kórsetedi. Psıhologtar qabyldaýshy ata-analar mektepterinde (budan ári – QAM) áleýetti asyrap alýshylardy daıyndaıdy, QAM-da olar jas psıhologıasy týraly, asyrandy balamen baılanys ornatý jáne búkil otbasynyń jańa ózgeristerge jumsaq beıimdelýi jaıly qundy bilim alady. Jalpy, osyndaı jaýapty qadamǵa bel býǵan azamattardyń barlyǵy qabyldaýshy ata-analar mektebinen ótýi qajet.
QAM maqsaty – ata-analardy balalar úıinen balany qabyldaýǵa daıyndaý, barlyq qajetti aqparatty berý, daǵdylardy úıretý, mańyzdy suraqtarǵa jaýap tabýǵa kómektesý, ózderiniń múmkindikteri men shekteýlerin túsiný, qabyldaýshy ata-ana bolýǵa daıyndyǵyn túsiný.
QAM ótý barysynda úmitkerler asyrap alynǵan balanyń erekshelikteri men qajettilikteri týraly túsinik alady; qabyldaýshy ata-ana retinde ózderiniń qabiletteri men múmkindikterin túsinedi; otbasyna qandaı balany qabyldaı alatynyn jáne qandaı qabyldaý túri qolaıly ekenin túsinedi.
Balalardy ornalastyrý salasynda keshendi tásil óte mańyzdy. Úmitkerdi oqytyp qana qoımaı, oǵan qansha qajet bolsa, sonsha ilespe kómek kórsetedi. Sondyqtan, bizdiń jumysymyzda mindetti baǵyt – qabyldaýshy otbasyǵa ilespe kómek kórsetý. Jumys tájirıbesinen biletinimiz, bala otbasyna kelgennen keıin eń qıyn kezeń - beıimdelý bastalady. Osy ýaqytta psıholog pen áleýmettik jumys jónindegi mamannyń otbasyǵa kásibı ilespe qoldaý kórsetýi óte mańyzdy.
İlespe kómek kórsetýdiń ár túrli formalary bar - bul otbasyna barý, mamandarmen kezdesý, psıhologıalyq keńes berý sekildi kóptegen kómekter. İlespe kómek balany qaıtarýdyń aldyn alý sharasy retinde qajet.
Otbasynda balalar úıinen kelgen balanyń jaraqattary ashyla bastaıdy. Bizdiń psıhologtardyń aıtýynsha, "bal aıy" aıaqtalǵannan keıin, bul ádette bir, eki, úsh aıdan soń barlyq otbasylarda "úırenisý" bastalady. Osy kezde qabyldaýshy otbasylarǵa qoldaý men kómek qajet. Bizdiń psıhologtar ár otbasyna kómektesýge tyrysady.
Búgingi tańda Bala asyrap alý jónindegi ulttyq agenttiktiń kómegimen qazaqstandyq otbasylarǵa 1890 bala ornalastyryldy (bul sıfra únemi ósip keledi)
2022 jyldyń mamyr aıynan bastap pılottyq joba iske qosyldy.
Pılottyq joba – jetim balalar men ata-anasynyń qamqorlyǵynsyz qalǵan balalardy, múmkindigi shekteýli jáne damý erekshelikteri bar balalardy otbasyna tárbıeleýge qabyldaýdy josparlap otyrǵan Qazaqstan Respýblıkasynyń azamattaryn yntalandyrýǵa jáne qoldaýǵa baǵyttalǵan "ANA ÚIİ" QQ qaıyrymdylyq bastamasy.
Jobany 3 jyl ishinde júzege asyrý josparlanyp otyr.
Qandaı kómek kórsetemiz:
- Qabyldaǵannan keıin balalardy ońaltýshy dárigerlerdiń tekserýinen ótýdi uıymdastyramyz
- Balalardyń medısınalyq ońaltýdan jáne (nemese) pedagogıkalyq túzetýden ótýi úshin tólem júrgizemiz
- Balalardyń ota emine tólem jasaımyz (qajet bolsa)
- Qabyldaýshy otbasyǵa konsýltasııalyq jáne aqparattyq kómek kórsetemiz.