Dárigerlerge medbıkelerdiń kómegi árqashan qajet
12 mamyr - meıirbıke isiniń mamandary ózderiniń kásibı merekelerin atap ótedi. Mereke qarsańynda Almatynyń Óńirlik komýnıkasıalar qyzmetiniń alańynda Densaýlyq saqtaý ardageri Gúlshara Ýrmýrzına sóz sóıledi.
Bul kún Halyqaralyq Qyzyl Kres komıtetiniń sheshimimen meıirbıke isiniń negizin qalaýshy áıgili aǵylshyndyq Florens Naıtıngeıldiń týǵan kúnine oraı tańdaldy. Jyl saıyn Halyqaralyq Meıirbıkeler keńesi kelise otyryp, óz urandaryn tańdaıdy. Bıylǵy jylǵy mereke "Medbıkeler – mamandyqtyń bolashaǵy" uranymen ótedi.
"Medbıkelerdiń densaýlyq saqtaý salasynyń damýyna qosqan úlesteri orasan zor. Korıfeıler medbıkeniń úsh qabiletke ıe bolýy kerektigin beker aıtpaǵan. Birinshisi - kásibılik, ekinshisi - tehnıkalyq eptilik, úshinshisi - shynaıylyq. Meıirbıke ıyǵyna túsetin barlyq jaýapty jumysty oryndaı alýy qajet. Qarapaıym jumystan bastap operasıa jasaıtyn hırýrgtyń kómekshisi retinde óte kúrdeli manıpýlásıalarǵa deıin bilýi kerek", - dep bólisti óz oıyn G.Ýrmýrzına.
Medısınalyq mekemelerdegi jumystyń úlken jáne jaýapty bóligi medbıkelerdiń moınynda. Spıkerdiń aıtýynsha, olar kez-kelgen medısınalyq mekemedegi taptyrmas qyzmetkerler bop sanalady.
"Dárigerlerge medbıkelerdiń kómegi árqashan qajet. Men alǵash balalar klınıkalyq aýrýhanasynyń bas dárigeri bolyp jumys istegenimde, bas medbıke Ababkova Maııa Aleksandrovna boldy. Men odan kóp nárseni úırendim. Ol barlyq dárigerlermen, orta medısına qyzmetkerler jáne tehnıkalyq qyzmetkerlermen til tabysa alatyn. Bizge kúndelikti, saǵat saıyn, mınýt saıyn qajet adamnyń biri osy kisi bolatyn. Densaýlyq saqtaýdyń qaı salasynda bolmasyn, óz úlesin qosqan medbıkelerimizdi maqtan tutamyn. Barsha meıirbıkelerdi tól merekelerimen quttyqtaımyn!", - dep qorytyndylady.
Aıta ketsek, G.Ýrmýrzınanyń basshylyǵymen Almatyda alǵash ret balalar stomatıkalyq sanatorııleri, aralas emhanalar, meıirbıkelik kútim aýrýhanasy, perınataldyq ortalyq, Adam urpaǵyn órbitý ortalyqtary ashyldy. Almaty qalasynyń perzenthanalarynda ana men balanyń birge bolý júıesi engizildi. Emdeý mekemeleriniń materıaldyq bazasyn damytýǵa jáne nyǵaıtýǵa, jumys pen kadrlar daıarlaýdyń jańa nysandary men ádisterin engizý úderisterine úlken úles qosty.
Gúlshara Ýrmýrzına "Ulttyq Medısınalyq Asosıasıasy" Respýblıkalyq qoǵamdyq birlestiginiń joǵarǵy nagradasy – "Altyn Dáriger" tósbelgisiniń jáne "Ave Vitae"ordeniniń ıegeri. Osy ýaqytqa deıin Respýblıkalyq deńgeılerde qoǵamdyq jumystarǵa belsendi atsalysyp, Almaty qalasynyń qoǵamdyq-saıası ómirine beıjaı qaramaıtyn úlken júrekti maman.