Jarysqa 20 memleketten 100 sportshy qatysady.
Elordada 28-31 qazan aralyǵynda «Barys Arenada» mánerlep syrǵanaýdan ekinshi Denis Ten Memorial Challenge halyqaralyq týrnıri ótedi, dep habarlaıdy Almaty-akshamy.kz Baq.kz-silteme jasap.
Týrnırdi Mádenıet jáne sport mınıstrligi, Ulttyq Olımpıada komıteti men Nur-Sultan qalasynyń ákimdiginiń qoldaýymen «Denıs Ten qory» qoǵamdyq qory uıymdastyrady.
Bıyl jarysqa 20 memleketten kelgen 100 sportshy qatysady. Bul qatarda osy jyly ótken álem chempıonatynyń júldegerleri men keler jyly Beıjińde jalaýy jelbireıtin aq Olımpıadanyń kóshbasshylary bar. Eresekter men jasóspirimder tobyna bólingen mánerlep syrǵanaýshylar jekeleı jáne juptyq synda óner kórsetedi.
Denis Ten Memorial Challenge mánerlep syrǵanaýdan bıyl «Chellendjer» (ISU Challenger Series) sanatynda ótetin 7-shi jarys. Halyqaralyq kónkıshiler odaǵy (ISU) atalǵan sanattaǵy halyqaralyq týrnırlerdi 2014 jyldan beri jylda 5 qyrkúıek pen 15 jeltoqsan arasynda Gran-Prı serıasyna qosymsha jarys retinde ótkizip keledi. ISU jyl saıyn týrnırler tizimin qaıta bekitedi.
«Chellendjer» serıasyndaǵy jarysta 1-5-shi oryn alǵan mánerlep syrǵanaýshylar halyqaralyq reıtıńte Gran-Prı, álem jáne qurlyq chempıonatyna qatysqan sportshylardan keıin eń kóp upaıǵa ıe bolady.
Ár jekeleı mánelep syrǵanaýshy, ıa bolmasa jup «Chellendjer» serıasyndaǵy 3 jarysqa qatysa alady. Al qatysýshylar reıtıńi túzilgen kezde sportshylardyń tek eki serıadaǵy úzdik kórsetkishi esepke alynady. Serıa qorytyndysy boıynsha eresekter men jasóspirimder sanatyndaǵy úzdik úshtikke qarjylaı syıaqy tabystalady.
Aıta keteıik, «Chellendjer» serıasyna kiretin Orta Azıadaǵy eń iri báseke – Denis Ten Memorial Challenge halyqaralyq týrnıri alǵash ret 2019 jyly 10-13 qazan aralyǵynda Almaty qalasynda ótken. Ol týrınrge 18 eldiń mánerlep syrǵanaýshysy qatysqan edi.