Maımyl sheshegi Eýropaǵa jetti.
Afrıkadaǵy m-pox (maımyl sheshegi) indetiniń keń taralýyna baılanysty Dúnıejúzilik densaýlyq saqtaý uıymy (DDSU) álem boıynsha densaýlyq saqtaý salasyndaǵy tótenshe jaǵdaıdy jarıalady, dep habarlaıdy aqshamnews.kz
Kongoda bir aptanyń ishinde indetti juqtyrýdyń 2000-nan astam jaǵdaıy tirkelip, vırýs kórshi elderge taraı bastady. Dúnıejúzi elderi, sonyń ishinde Qazaqstan men Qytaı da vırýstyń aldyn alý jáne onyń taralýyna jol bermeý úshin tıisti is-sharalardy kúsheıte bastady.
Afrıkanyń aýrýlardy baqylaý jáne aldyn alý ortalyqtary Kongoda maımyl shesheginiń juqpaly shtamynyń jyldam taralýyna baılanysty kontınentte densaýlyq saqtaý salasyndaǵy tótenshe jaǵdaı jarıalady. Óıtkeni qaýipti vırýs kórshi elderge taraı bastady.
Dúnıejúzilik densaýlyq saqtaý uıymynyń bas dırektory Tedros Adhanom Gebreıesýs álem elderin qaýipke erekshe nazar aýdarýǵa jáne ınfeksıanyń odan ári taralýyna jol bermeý úshin qajet sharalardy qabyldaýǵa shaqyrdy. Qazirgi kezdegi basty maqsat – Afrıkada vırýstyń taralýyna tosqaýyl qoıý jáne onyń álemniń basqa bólikterine taralýyna jol bermeý.
Maımyl sheshegi vırýsynan týyndaıtyn bul aýrý alǵash ret 1958 jyly Danıada zerthanalyq maımyldar arasynda tabylǵan. Vırýstyń adamǵa juǵýynyń alǵashqy jaǵdaıy 1970 jyly Kongo Demokratıalyq Respýblıkasynda tirkelgen.
Maımyl shesheginiń taralýy negizinen Ortalyq jáne Batys Afrıkamen shektelip keldi. Biraq 2022 jyldyń mamyrynda Eýropa men Soltústik Amerıkada da tirkeldi. 2023 jyly aýrý oshaqtary azaıǵanyna qaramastan, vırýstyń taralýy jalǵasyp keledi. Afrıkanyń aýrýlardy baqylaý jáne aldyn alý ortalyqtarynyń málimetterine qaraǵanda, ótken aptada ǵana Afrıkada maımyl shesheginiń 2000-nan astam jańa jaǵdaıy tirkeldi.