Búgin – dıktor, Qazaqstannyń halyq ártisi Ánýarbek Baıjanbaevtyń týǵan kúni.
Osyǵan oraı daýyrpaz daýys ıesiniń oı-tolǵamdaryn usynýdy jón kórdik.
Dıktor — mátinmen durys jumys isteı alatyn jýrnalıs.
Dıktor keń tynysty adam bolýy kerek. Ol ishke tereń bir ret dem alyp, sol aýany on tórt ret sanaǵansha az-azdap shyǵarýǵa, sony osy tylsym shaqqa únemdep jetkizýge úırengeni durys.
Dıktor bolam degen jas talapker úsh zaýaldan: tamaqqa sýyq tıgizip alýdan, temeki tartýdan jáne shekildeýik shaǵýdan aýlaq bolǵany jón. Óıtkeni munyń úsheýi de — tabıǵattyń ózine bergen tamasha kómeı daýysyn baryldatyp búldiretin zymıan, sazdy ún men mýzykaly áýezdiń qas jaýy...
Jasyl tústi unatamyn. Jasyl túske jastaıymnan qumarmyn. Shirkin, jasyl jaılaýǵa ne jetsin! Onyń sebebi kózimniń sál-sál aqaýy bolǵandyqtan shyǵar. Tegi jasyl túske nur bitken jaqsy qanady. Jasyl boıaý — ejelden, sonaý baǵzy zamannan joly bolǵan boıaý. Máselen, poıyz ben mashınanyń joly bolýy úshin qashannan jarqyrap jasyl jaryq janady emes pe?!