29 maýsym kúni Almatyda jańartylǵan «Kúnshýaq» ortalyǵy tyń serpinmen esigin aıqara ashty. Ortalyq jumysy «Samuryq-Qazyna» AQ kompanıalar toby atynan birińǵaı qaıyrymdylyq operatory – «Samruk Kazyna Trust» qorynyń qarjylyq qoldaýymen jandandy, -dep habarlaıdy Almaty-akshamy.kz.
Joba aıasynda balalardyń oı-sanasyn damytatyn, ońaltyp, dene shynyqtyratyn, kúndelikti qyzmetke qajet qural-jabdyqtar alyndy. Sondaı-aq Qor kómegimen tájirıbe almasý maqsatynda sheteldik mamandar tartylyp, Astana, Almaty qalalarymen Atyraý, Pavlodar, Qostanaı oblystaryndaǵy daýn sındromy bar balalardyń atan-analaryna keńes berý sharalary júrgizildi. Jobanyń búdjeti 100 mln teńgeni quraıdy.
Ortalyqtyń ashylý saltanatyna qatysqan «Samuryq-Qazyna» AQ qoǵammen baılanys, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov tıisti nysannyń qoǵamǵa berer paıdasy men mańyzdylyǵyn atap ótti.
«Birlesken is-qımyldyń nátıjesinde ortalyq zaman talabyna saı jabdyqtalyp otyr. Jalpy bizdiń Qor balalarǵa baılanysty bastamalardy árdaıym qoldap keledi. Máselen, ótken jyldan beri 73 myńnan astam balaǵa túrli baǵyttaǵy kómek kórsetildi. Sondyqtan erekshe balalarymyzǵa jáne olardyń ata-analaryna búgingi jańalyq óte jaqsy syılyq boldy dep oılaımyn. Endi osy jerde joǵary deńgeıdegi ońaltýdan ótip, alǵa qaraı nyq qadam jasaý qajet», - dedi «Samuryq-Qazyna» AQ basqarýshy dırektory.
Ortalyq balaǵa týǵanynan damý men oqýdyń barlyq satylarynan ótýge múmkindik beredi. Sonymen qatar, ınklúzıvti bilim berý salasyndaǵy mamandardy daıyndaýǵa jáne Daýn sındromy bar adamdardy jumysqa ornalastyrý jol ashady.
«Daýn sındromy bar jandarǵa arnalǵan ortalyqtyń ashylýy Almaty úshin ǵana emes, búkil Qazaqstanǵa mańyzdy oqıǵa. Atalmysh nysan basqa qalalar men oblystarǵa erekshe úlgi bolatyny anyq. Osyndaı ortalyqtardy basqa óńirlerde de ashý josparymyzda bar. Jobanyń iske asýyna qarjylyq qoldaý kórsetip otyrǵan seriktesterimizge alǵysymyzdy jetkizemiz», - dedi óz kezeginde ortalyqtyń dırektory Gvıdo Tressanı.