Dostyq úıinde Almaty qalasy ákiminiń orynbasary Arman Qyryqbaevtyń tóraǵalyǵymen «Qazaqstan halqy Assambleıasynyń XXXII sesıasynyń mindetteri jáne olardy iske asyrý joldary» taqyrybynda Almaty qalasy Qazaqstan halqy Assambleıasynyń XXV sesıasy ótti,-dep habarlaıdy Almaty-akshamy.kz.
İs-sharaǵa Almaty aýdandary ákimderiniń orynbasarlary, qalalyq basqarmalardyń basshylary, Qazaqstan halqy Assambleıasynyń Almaty ókildiginiń músheleri men respýblıkalyq jáne qalalyq etnomádenı birlestikterdiń tóraǵalary qatysty.
Arman Qyryqbaev óz sózinde qalalyq Assambleıanyń eldi saıası jańǵyrtýdaǵy, jalpyulttyq birlikti nyǵaıtýdaǵy mańyzdy rólin atap ótti.
– Almaty – tarıhy men mádenıeti mol kópultty qala. Munda ártúrli etnostar men ulttardyń kóptegen ókilderi turady. Búgingi shara qalalyq Assambleıa jumysyn jetildirý barysynda óte tıimdi serpilis beretinine senimdimin. Assambleıa atqaratyn jumystyń arqaýy – strategıalyq qujattardy jurtshylyq arasynda túsindirý, olardyń iske asyrýǵa qoǵamdy jumyldyrý, – dep atap ótti qala ákiminiń orynbasary.
Aıta keteıik, Assambleıa rýhanı qundylyqtardy ilgeriletý boıynsha jalpyulttyq mańyzy bar jobalardy iske asyrady, volonterlik jáne qaıyrymdylyq is-sharalardy belsendi qoldaıdy, medıasıa ınstıtýtynyń damýyna úles qosady, jastarmen tyǵyz jumys júrgizedi.
Arman Qyryqbaev aqparattyq-túsindirý jumystary arqyly profılaktıkanyń mańyzdylyǵyn atap ótip, áleýmettik jelilerdegi jumysqa basa nazar aýdarýdy, keń aýdıtorıamen jumys isteýdi ilgeriletýdi, memlekettik ulttyq saıasattyń basymdyqtary men Assambleıa qundylyqtaryn dáıekti túrde qorǵaýdy usyndy. Sondaı-aq, ol Májilis depýtattarymen ózara is-qımyl jáne Almaty máslıhaty janynan osyndaı top qurý máselesin qozǵady.
Qala ákiminiń orynbasary Bilim jáne jastar saıasaty basqarmalaryna Assambleıanyń qoǵamdyq qurylymdaryn bilim berý mekemelerinde aqparattyq-túsindirý jumystaryna tartý jóninde sharalar qabyldaýdy tapsyrdy.
«Jastar Assambleıasy ózderiniń is-sharalary men birlestik qataryna kóbirek tartý maqsatynda jastar qozǵalystarynyń kóshbasshylarymen jáne jastarmen túsindirý jumystaryn kúsheıtýi qajet. Bilim berý, jumysqa ornalastyrý, kásipkerlik jáne t.b. máseleleri boıynsha is-sharalar uıymdastyrý, áleýmettik jelilerde halyq birligin nyǵaıtý boıynsha túsindirý jumystary jıi júrgizilý kerek. Munyń bári jas urpaqtyń ekonomıkalyq, ınovasıalyq, shyǵarmashylyq belsendiligin iske asyrý úshin barynsha qolaıly jaǵdaı jasaýǵa múmkindik beredi», – dep atap ótti A.Qyryqbaev.
Otyrys barysynda qalalyq Assambleıa tóraǵasynyń orynbasary, Almatydaǵy «Qazaqstan Orys mádenı ortalyǵynyń» tóraǵasy Vsevolod Lýkashev sóz sóıledi. Almaty QHA Aqsaqaldar keńesi jumysy týraly onyń tóraǵasy Ahmetjan Shardınov aıtyp berdi. QHA-nyń jastar saıasatyna Almaty qalasyndaǵy «Assambleıa jastary» RQB ókildiginiń kýratory, uıǵyr jastar odaǵynyń tóraǵasy Rýstam Qaıyraev egjeı-tegjeıli toqtaldy. Al QHA múshesi, «Sóıle» qazaq tili klýbynyń oqytýshysy Alına Kan Assambleıa jumysy tóńireginde jáne qazaq tilin qarapaıym ári qyzyqty jolmen qalaı úırenýge bolatyny týraly baıandady.
Kezdesý barysynda qatysýshylar bolashaqqa arnalǵan mindetterdi aıqyndap, Assambleıanyń XXXII sesıasynda berilgen tapsyrmalardy iske asyrý boıynsha birlesken jumystyń odan ári baǵyttaryn talqylady.