Jiti mı qan aınalymynyń buzylýy (ınsýlt) kezinde mehanıkalyq tromboekstraksıa ádisin qoldaný naýqastyń tolyq qalpyna kelý múmkindigin arttyrady.
Bul shaǵyn ınvazıvti ádis arqyly tromb alynyp, «terapıalyq terezeni» keńeıtýge bolady. Dástúrli trombolıtıkalyq terapıamen salystyrǵanda, bul ádis qaıtymsyz asqyný qaýpin azaıtady. Mundaı otalar Almaty №4 qalalyq klınıkalyq aýrýhananyń rentgen-endovaskýlárlyq hırýrgıa bólimshesinde sátti júrgiziledi, dep habarlaıdy aqshamnews.kz.
«Tromboekstraksıa ınsýlt alǵan naýqasqa tolyqqandy ómirge oralýǵa múmkindik beredi. Bul jerde ýaqyt basty ról atqarady: shaǵyn ınvazıvti hırýrgıalyq aralasý neǵurlym erte jasalsa, tolyq qalpyna kelý yqtımaldyǵy soǵurlym joǵary bolady. Bizdiń tájirıbemizde jaqsy nátıje bar - ınsýlt saldarynan sal bolyp qalǵan naýqastar birneshe kúnnen keıin ózdiginen júrip, sóıleı aldy», - deıdi №4 QKA neırohırýrg dárigeri Aldongar Aısaýtov.
39 jastaǵy er adam №4 qalalyq klınıkalyq aýrýhananyń qabyldaý bólimine sóıleý qabiletiniń buzylýy, oń aıaq-qolynyń álsizdigi jáne qos kóriný sıaqty ınsýlttiń jiti belgilerimen tústi. Osylaısha belgileri anyqtalǵannan bastap alty saǵat ishinde neırohırýrg mamandar mehanıkalyq tromboekstraksıa jasap, naýqastyń mı qyzmetin tolyq qalpyna keltire aldy. Bir aptadan keıin ol nevrologıalyq asqynýsyz aýrýhanadan úıge shyǵaryldy.
«Nevrolog, neırohırýrg jáne reanımatolog dárigerlerdiń úılesimdi jumysynyń arqasynda mehanıkalyq tromboekstraksıa ómirdi qutqarý standartynyń birine aınalyp keledi. Bul ádis kóptegen naýqastyń múgedektikke ushyraýynyń aldyn alyp, qalypty ómirge oralýyna kómektesedi», – dep atap ótti №4 QKA Insýlt ortalyǵynyń meńgerýshisi Dınara Mýhangalıeva.