№11 qalalyq emhanada Ashyq esik kúni ótti
1 maýsym – Halyqaralyq balalardy qorǵaý kúni qarsańynda jáne respýblıkalyq “Dáriger – balalardyń janashyry” aksıasy aıasynda №11 qalalyq emhanada S.D. Asfendıarov atyndaǵy Qazaq ulttyq medısına ýnıversıtetiniń profesorlyq-oqytýshylyq quramynyń qatysýymen Ashyq esik kúni uıymdastyryldy, dep habarlaıdy aqshamnews.kz
İs-sharanyń maqsaty – balalarǵa keńestik-dıagnostıkalyq kómek kórsetý, sondaı-aq ata-analarǵa balanyń densaýlyǵyna jaýapkershilikpen qaraý, mamandarǵa ýaqytyly júginý qajettiligi týraly túsindirý jumystaryn júrgizý boldy.
Kún boıy QazUMÝ-dyń balalar medısınasy salasyndaǵy jeti túrli beıindi mamany – profesorlar, medısına ǵylymdarynyń kandıdattary jáne joǵary sanatty dárigerler – kishkentaı pasıentterge tekserý júrgizip, keńes berdi.
Atap aıtqanda, is-sharaǵa balalar endokrınology, kardıorevmatolog, alergolog-pýlmonolog, ınfeksıonıst, hırýrg, gastroenterolog jáne pedıatr qatysty.
№11 qalalyq emhanasy mundaı is-sharalardy dástúrge aınaldyrǵan. Munda balalar aýrýynyń aldyn alýǵa, erte dıagnostıka júrgizýge jáne ata-analardyń balanyń densaýlyǵyna sanaly kózqaras qalyptastyrýyna erekshe kóńil bólinedi.
Balalardy qorǵaý kúni – bul tek mereke ǵana emes, árbir balanyń quqyǵy men saýlyǵyn saqtaý qajettigin eske salar mańyzdy kún. Barsha bala súıispenshilikte, qaýipsiz ortada, eń bastysy – aman-saý óssin!