Qazaqstandaǵy segizinshi ulttyq Freedom Ticketon Awards premıasynyń jeńimpazdary belgili boldy. Bıyl premıa jańa formatta usynyldy: daýys berý tártibi men marapattaý rásimi de ózgeriske ushyrady, dep habarlaıdy aqshamnews.kz
Premıanyń aıasynda barlyǵy 6 kategorıa, 27 nomınasıa boıynsha jeńimpazdar anyqtaldy: «kıno», «konsert», «teatr», «ART», «balalarǵa arnalǵan qoıylymdar», «ǵylym men mańyzdylyq».
Freedom Ticketon Awards 2025 jeńimpazdaryn anyqtaý jańa sqema boıynsha júrgizildi. Úmitkerlerge daýys berý úsh kezeńge bólindi:
-halyqtyq daýys berý 3 naýryz ben 16 sáýir aralyǵynda https://award.ticketon.kz/ saıtynda ótti. Barlyq qalaýshylar mádenıet pen óner salasyndaǵy súıikti tulǵalaryna daýys bere aldy. Barlyǵy 142 875 daýys berildi.
-nomınanttardyń daýys berýi. Bıyl alǵash ret premıa nomınanttary arnaıy promokodtardy paıdalana otyryp, óz nomınasıalarynda daýys bere aldy. Alaıda, ózderine daýys berýge ruqsat etilmedi;
-uıymdastyrý komıtetiniń daýys berýi de promokodtar arqyly júzege asty. Bıylǵy Ticketon Awards uıymdastyrý komıtetiniń quramyna óner salasynyń tanymal ókilderi kirdi: kınorejısser Rashıd Nýgmanov, prodúser jáne ánderdiń avtory Eva Beher, dramatýrg Olga Malysheva, medıa-prodúser Azamat Áshimov, kınosynshy Oleg Boreskıı, telejúrgizýshi Adel Smıt, sondaı-aq Freedom Ticketon kompanıasynyń marketıń dırektory, premıanyń joba menedjeri Anna Voronına. Uıymdastyrý komıtetiniń tóraıymy – Freedom Ticketon kompanıasynyń bas dırektory Vıktorıa Torgýnakova boldy.
Halyqtyq daýys berý nátıjesi boıynsha kóshbasshy 50 upaı aldy, al qalǵan nomınanttar óz daýystarynyń sanyna qaraı kóshbasshymen salystyrmaly túrde upaı jınady. Uıymdastyrý komıteti múshesiniń árbir daýysy 15 bal retinde eseptelse, al nomınanttyń basqa qatysýshyǵa bergen árbir daýysy 5 bal bolyp qosyldy. Daýys berý nátıjelerin premıanyń táýelsiz aýdıtorlyq toby eseptedi. Olar qupıalylyq týraly kelisimge (NDA) qol qoıyp, 28 mamyrda ótken «Ticketon Awards» marapattaý rásimine deıin daýys berý nátıjelerin qupıa ustady.
Barlyq jeńimpazdarǵa Freedom Ticketon platformasynda jarnamalyq ilgeriletýge arnalǵan sertıfıkattar jáne birneshe mıllıon teńgege deıingi aqshalaı syılyqtar tabystaldy. Jalpy júlde qory – 58 mıllıon teńgeni qurady! Kóptegen jeńimpazdardyń aıtýynsha, bul marapat olardyń jobalaryn jańa damý deńgeıine shyǵarýǵa, promoýshnmen qamtamasyz etýge jáne qazaqstandyq mádenıettiń jańa jobalary týraly keń aýdıtorıaǵa aqparat taratýǵa zor múmkindik beredi.
Bıyl saltanatty rásim premıa úshin ádetten tys sıfrlyq formatta ótti. Uıymdastyrý komıteti men arnaıy shaqyrylǵan juldyzdy qonaqtar QR Á.Qasteev atyndaǵy Memlekettik óner mýzeıiniń bir zalynda bas qosty. Rásimge qatysqysy kelgen kórermenderdiń barlyǵy onlaın tamashalady.
Jeńimpazdardyń esimderi jazylǵan konvertterdi qazaqstandyq óner men mádenıet salasynyń tanymal ókilderi ashty: «Monte-Karlonyń birinshi skrıpkasy – 2004» ataǵynyń ıegeri Djamılá Serkebaeva, REPAS komandasynyń graffıtı-sýretshisi Nıkıta Biggie, ER10 Media jobasynyń negizin qalaýshy jáne CEO Elnora Rozmýhamedova, Qazaqstannyń eńbek sińirgen qaıratkeri, KSRO kınematografıster odaǵynyń múshesi Jan Baıjanbaev, akter jáne shoýmen Qajet Smaǵul, tanymal ánshi, Qazaqstannyń eńbek sińirgen qaıratkeri Janna Orynbasarova, QR eńbek sińirgen ártisi Aıjan Nurmaǵambetova, sondaı-aq premıanyń Uıymdastyrý komıtetiniń músheleri.
Jeńimpazdardyń esimderi saltanatty rásimge deıin qupıa saqtaldy. Laýreattar jarıalanǵannan keıin júrgizýshiler Gýlbahor Hasanova men Aset Serǵazy olarǵa tikeleı efırde qońyraý shalyp, quttyqtady. Keıbir jeńimpazdar kútpegen qońyraýǵa tańǵalyp, abdyrap qaldy.
Azerbaıjan Mámbetov atyndaǵy memlekettik drama jáne komedıa teatrynyń ártisteri “Jyl spektakli” (memlekettik teatrlar arasyndaǵy) nomınasıasyndaǵy jeńisi týraly estigen sátte tolqynystaryn jasyra almaı, jarqyn daýystarymen efırdi jandandyryp jiberdi. Al “Qazaqstandyq jyldyń konserti” nomınasıasynyń jeńimpazy Dımash Qudaıbergenmen tikeleı baılanys ornatý múmkin bolmaǵanymen, efırge ákesi, aqyn Qanat Aıtbaev shyqty. Kórermender onyń ulyna degen shynaıy qýanyshy men maqtanyshyn kózben kórip, júrekpen sezindi.
TARSI SYMPHONY ORCHESTRA ujymy atynan Erlan Beısembaev alǵan áserimen bólisti: «Sońyna deıin kim jeńetinin bilmedik, shyn máninde bizge qońyraý shalady dep te oılaǵan joqpyz. Sol sátte daıyndyq ústinde edik, kenet qońyraý kelip tústi. Barlyǵymyz abdyrap qaldyq, meniń boıymda erekshe tolqý boldy. Bizdiń ujymnyń tikeleı efırge shyqqany – úlken mártebe. Osyndaı sátterde uıqysyz túnder men tynymsyz eńbektiń esh ketpegenin túsinesiń. Bul – búkil tobymyzdyń birlesken eńbeginiń jemisi!»
Mundaı áserli sátter saltanatty rásimge erekshe shynaıylyq pen jylylyq berip, kórermen men qatysýshylardyń arasynda tikeleı baılanysty sezinýge múmkindik syılady. Sonymen qatar, onlaın-format premıa jeńimpazdaryn Qazaqstannyń túkpir-túkpirinen jınaýǵa jol ashty. Mundaı aýqymdy qamtý dástúrli oflaın sharada ońaı júzege asar ma edi – belgisiz. Al onlaın-efır arqyly Oral pen Aqtóbeden bastap, Túrkistan men Jarkentke deıingi kórermender jeńimpazdarmen birge qýanyshqa ortaqtasa aldy.
«Jyldyń otandyq fılmi» nomınasıasynda kórermenderdiń ystyq yqylasyna bólengen Qazaqstan men Qyrǵyzstan birlesken dramasy «Prıgovor» jeńimpaz atandy. «Jyldyń kınoakteri» ataǵy komedıalyq «Brat ılı brak» trılogıasyndaǵy este qalarlyq róli úshin akter Dáýren Serǵazınge buıyrdy. Bıyl alǵash ret engizilgen «Jyldyń ART-obektisi» nomınasıasynda jeńiske «Vıktor Soıǵa arnalǵan art-obekt» ınstallásıasy jetti. Bul jumys «Igla» fılminiń rejıseri Rashıd Nýgmanovtyń qatysýymen ashylǵan bolatyn. Jeke teatrlar baǵyty boıynsha jyldyń spektakli dep Razıa Hasanovanyń Interius teatry qoıǵan sezimge toly ári tanymal «Kóńildes áıel» spektakli tanyldy.
Jeńimpazdardyń tolyq tizimimen Freedom Ticketon kompanıasynyń @ticketonkz Instagram paraqshasynda tanysýǵa bolady.
Premıanyń jabylý rásiminde Freedom Ticketon kompanıasynyń bas dırektory Vıktorıa Torgýnakova Almaty qalasyna erekshe syı jasalatynyn habarlady — qala ákimdigi jáne Repas art-komandasynyń qatysýymen mýral salynady.
«Biz alǵashqy mýralymyzdy Qazaqstan kınematografıasynyń naǵyz ortalyǵyna aınalǵan Almaty qalasyna arnaǵymyz keledi. Óz zamanynda bul qala kóptegen tanymal akterler men rejıserlerdi qushaq jaıa qarsy alyp, olar osy jerde uly kınony jasaýǵa kirisken. Bul sát otandyq kıno óndirisiniń damýyna serpin berdi. Sondyqtan bizdiń alǵashqy mýralymyz dál osy – kınematografıa ómir súretin qala Almatyda paıda bolady», – dedi ol.
Kesh barysynda prodúser, Ticketon Awards premıasynyń júrgizýshisi Gýlbahor Hasanova óz áserimen bólisti: «Búgingi kesh Freedom Ticketon-nyń aýqymyn, kúshin jáne Qazaqstan kreatıv ındýstrıasynyń daryndylyǵyn kórsetti. Bul premıa – jaı ǵana marapat emes, ónerge janyn salǵan jandarǵa degen qurmet. Barlyq nomınanttar men jeńimpazdardy shyn júrekten quttyqtaımyn! Halyqtyń súıispenshiligi men shynaıy alǵysyna ıe bola berińizder!»
Premıa uıymdastyrý komıtetiniń tóraıymy Vıktorıa Torgýnakova kompanıanyń basty mısıasy týraly aıta ketti:
: «Bizdiń maqsatymyz – kórermen men óner áleminiń arasyndaǵy kópir bolý. Biz damyp kelemiz, jańa tehnologıalardy engizip jatyrmyz – bul durys baǵytta kele jatqanymyzdyń belgisi. Ár nárse birden bola qoımaıdy, biraq árbir synaq bizdi jetildire túsedi, tıimdirek bolýǵa ıtermeleıdi jáne otandyq kórermenge mádenıet pen óner álemine jaqyndaýdyń jańa múmkindikterin ashady», – dedi ol