Búgín vıtse-premer – ūlttyq ekonomıka mınıstrí Serík Jūmanǵarın keńes ótkízíp, elímízdíń JÍÓ ósímíníń qūramdas bólígí men ekonomıkaǵa qomaqty úles qosyp otyrǵan salalardyń damu serpínín arttyru múmkíndíkterín talqylady. Qaı salalarda ósím baıqalady? Qaı salany damytu kerek? Bıyl JÍÓ-níń 6 paıyz ósímíne qalaı qol jetkízemíz? Tolyǵyraq Aqshamnews.kz materıalynda.
2025 jyldyń qańtar–mamyr aılarynda elímízdíń jalpy íshkí ónímí 6 paıyzǵa artqan. Būl – Ūlttyq statıstıka byurosy ūsynǵan aldyn ala málímet.
Qaı salalarda ósím baıqalady?
Ekonomıkalyq ósímge negízgí salalardaǵy – ónerkásíp, qūrylys, sauda, kólík jáne baılanys sektorlaryndaǵy qarqynnyń údeı túsuí áser etken:
- Ónerkásíp óndírísí bıylǵy qańtar–mamyrda 6,4 paıyzǵa óstí. Būl kórsetkísh eldíń barlyq 17 óńírínde tírkelgen ósímmen baılanysty;
- Auyl sharuashylyǵy salasynda oń serpín saqtalady – ósím 4 paıyz boldy. Aıta keteıík, sáuírge deıín kórsetkísh 3,9 paıyz bolǵan.
- Qūrylys salasy qarqyndy damyp keledí, būl sala 15,4 paıyz ósímge jettí. Eldíń 18 óńírínde oń dınamıka tírkelse, ásírese Mańǵystau oblysynda írí ınfraqūrylymdyq jobalar esebínen qūrylys kólemí ekí esege artty.
- Negízgí kapıtalǵa salynǵan ınvestıtsıyalar kólemí 18,2 paıyzǵa ūlǵaıdy. Qarjy aǵyny negízínen kólík, óndírístík jáne áleumettík ınfraqūrylym jobalaryna, sonymen qatar, jańa ónerkásíptík nysandar men zamanauı jabdyqtarǵa baǵyttalǵan.
- Sauda sektorynda da tūraqty ósím baıqalady. Sauda aınalymy 7,8 paıyzǵa artty, būl aldyńǵy aıdaǵy 7 paıyzdyq kórsetkíshpen salystyrǵanda bírshama joǵary. Íshkí sauda qūrylymynda kóterme sauda úlesí 68 paıyzǵa juyqtap, osy segment 8,3 paıyzǵa ósse, bólshek sauda 6,5 paıyzdyq kórsetkíshke jettí.
- Baılanys jáne telekommunıkatsıya salasynda 2,8 paıyz ósím tírkeldí. Būǵan ınternet qyzmetteríne degen sūranystyń artuy áser ettí. Būl baǵyttaǵy ósím 13,9 paıyz boldy.
- Kólík salasy eń joǵary kórsetkíshtí kórsetíp otyr – 23,1 paıyz. Mūndaı serpíndí ósím, eń aldymen, júk temírjol kólígíníń jáne qūbyr arqyly tasymaldau kólemíníń ūlǵayuyna tíkeleı baılanysty.
Bıyl JÍÓ-níń 6 paıyz ósímíne qalaı qol jetkízemíz?
Būl sūraqqa vıtse-premer – ūlttyq ekonomıka mınıstrí Serík Jūmanǵarın keńeste jauap berdí.
"Bízdíń maqsatymyz – bıyl JÍÓ 6%-dyq ósímíne qol jetkízu. Ol úshín naqty sektordaǵy barlyq sala belgílengen ındıkatorǵa sáıkes jūmys ísteuge tıís. Ákímshílík kedergílerdí jedel joıyp, kompanıyalar óz ónímín shyǵarudy ūlǵaıtuy úshín árbír saladaǵy qarqynnyń bayaulauy esebínen naqty aılyq josparlar ázírleu qajet", — dep atap óttí Serík Jūmanǵarın.