QR Ulttyq ekonomıka mınıstri Álibek Qýantyrovtyń tóraǵalyǵymen «Damý» kásipkerlikti damytý qory» AQ Strategıalyq sesıasy ótti.
Usynylǵan strategıa jobasy Memleket basshysynyń Qazaqstan halqyna arnaǵan «Ádil Qazaqstannyń ekonomıkalyq baǵyty» atty joldaýynda aıtylǵan tapsyrmasyn, atap aıtqanda memlekettik qoldaý júıesin jetildirý arqyly orta kásipkerlikti damytý boıynsha jańa keshendi tásilderdi qalyptastyrý qajettigin qamtıdy, dep habarlaıdy almaty-akshamy.kz.
Strategıaǵa sákes, «Damý» Qory el ekonomıkasyn damytý úshin áleýetti orta bıznestiń damýyn yntalandyrýǵa barynsha serpin berýdi josparlap otyr. Onyń ishinde shıkizatqa táýelsiz sektorlardaǵy eksportqa ónim shyǵaratyn jáne ımporttyń ornyn basatyn jobalarǵa basymdyq beriledi.
SHOB-ty damytýdaǵy memlekettik quraldardyń biri – kepildiktiń aıasyn keńeıtý kózdelgen. Bul qural EDB ótimdiligin el ekonomıkasyn nesıeleýge tartý máselesin sheshýge yqpal etedi.
Ár óńirdiń ereksheligi men basymdyq berilgen salalaryn eskere otyryp, ákimdiktermen birlesken óńirlik qarjy baǵdarlamalardy damytý da josparda bar.
Munymen qatar Qor naryǵynyń ónimderi arqyly balama qoldaý quraldaryn damytý kózdelgen. Osy baǵyttyń negizgi maqsattarynyń biri – bıznes-jobalardy ınvestısıalaýǵa jeke naryqty kiristire otyryp, SHOB-qa qarjy tartý múmkindigi bolmaq. SHOB-ty qamtýda ıslam qarjy quraldary men faktorıń operasıalaryn damytý mańyzdy ról atqarady.
Strategıa bıznes-prosesterdi sıfrlandyrý úshin IT men tehnologıalyq sheshimder engizip, front-keńseni onlaın formatqa kóshirý jáne tıimdi jumys isteıtin ekojúıe qurýǵa da basa nazar aýdarady. Búginde kásipkerlerge yńǵaıly bolý úshin Qordyń barlyq bıznes-prosesteri kásipkerdiń ótinim berýinen bastap sýbsıdıalaý/kepildik berý shartyna qol qoıýǵa deıin sıfrlanǵan.
Qor jasyl jáne áleýmettik jobalardy qosa alǵanda, ESG-jobalar úlesin arttyrý, áıelder men jastar kásipkerligin qoldaý arqyly óz qyzmetine «ESG» faktorlaryn engizýdi jáne ıntegrasıalaýdy jalǵastyrady.
Úkimet elimizde SHOB-ty damytý boıynsha úlken jumys júrgizýde. Buǵan osy saladaǵy kórsetkishter dálel. Mysaly, shaǵyn jáne orta bıznes ónimderin óndirý 47,2 trln teńgeden asty, jumyspen qamtylǵandar sany 4,3 mln adamdy quraıdy. 2023 jyly 12,3 myń joba sýbsıdıalandy, jalpy nesıe somasy 1 trln teńgeni qurady. Nesıe somasy 363 mlrd teńge bolatyn 8,2 myń jobaǵa kepildik berildi. Úkimet ekonomıka ósiminiń negizgi draıveri retinde SHOB-ty damytý sharalaryn jalǵastyrady. Búdjet qarajatyn paıdalaný tıimdiligin, onyń lımıtin arttyrý jáne SHOB sýbektilerin kóptep qarjylandyrý maqsatynda sýbsıdıadan kepildik pen qorlandyrýdyń balama quraldaryna qaraı kóshý qajet, - dep atap ótti mınıstr.
Sesıa barysynda negizgi qatysýshylardyń jańa usynystary men kózqarastary tyńdaldy. Qordyń quraldary men qyzmetin odan ári jetildirý joldary aıqyndaldy. Jıyn sońynda qatysýshylar strategıalyq sesıada aıqyndalǵan maqsattar men josparlar «Damý» Qorynyń eldegi kásipkerlikti damytý mısıasyn tabysty júzege asyrýyn jalǵastyrýǵa kómektesetinine senim bildirdi.