Mınıstrdiń BAQ-qa degen kózqarasyn Almatyda aldygúni bolǵan jer silkinisi aıqyndaı túsken.
Bul týraly Aıda Balaeva óziniń Facebook paraqshasynda jazba jarıalady, dep habarlaıdy Almaty-akshamy.kz 24.kz-ke silteme jasap.
«Qurmetti dostar! Almatyda bolǵan jer silkinisi senimdi jáne der kezinde jetkiziletin aqparattyń mańyzdylyǵyn dáleldep, tótenshe jaǵdaılar men basqa da oqys oqıǵalarda buqaralyq aqparat quraldarynyń sheshýshi rólin taǵy da aıqyndady. Osyǵan oraı, Mádenıet jáne aqparat mınıstrligi jaqyn arada tótenshe jaǵdaılar kezinde BAQ pen áleýmettik jeliler jumystarynyń egjeı-tegjeıli algorıtmin usynbaq. Sondaı-aq, biz Tótenshe jaǵdaılar mınıstrligi, Densaýlyq saqtaý mınıstrligi, Eńbek jáne halyqty áleýmettik qorǵaý mınıstrligi, İshki ister mınıstrligi jáne basqa da múddeli memlekettik organdar ókilderiniń qatysýymen BAQ qyzmetkerleri úshin birqatar oqý trenıńterin ótkizýdi josparlap otyrmyz. Trenıń aıasynda qatysýshylar tótenshe jaǵdaılarda, mıtıńilerde, órt kezinde, jazataıym oqıǵalar men balalardyń qatysýymen bolǵan faktilerdi jarıalaýǵa qatysty qajetti usynystar men nusqaýlardy ala alady. Buqaralyq aqparat quraldarynyń jumysy tek obektıvti jáne ýaqytyly aqparat taratý ǵana emes, keıde adamdardyń ómiri men densaýlyǵy úshin de jaýapty ekenin bilý mańyzdy», - delingen jazbada.