Almatyda «Damý bala» baǵdarlamasy boıynsha oqıtyn balalar úshin Face ID júıesi bıyldyń sońyna deıin engiziledi. Bul týraly Ortalyq komýnıkasıalar qyzmetinde ótken brıfıńte Almaty ákimi Erbolat Dosaev málimdedi, dep habarlaıdy aqshamnews.kz
Qala basshysy Almaty qalasynyń Qoǵamdyq keńesimen birlesip, seksıalar men úıirmelerdi tekserý júrgizilgenin jáne «Damý bala» baǵdarlamasy boıynsha qyzmet kórsetýde adal emes jetkizýshiler anyqtalǵanyn atap ótti.
«Adal emes jetkizýshiler balalarymyzdy, ata-analardy aldap otyr, al keıbir ata-analar mundaı jaǵdaılarǵa kelisip jatqanyn kórip otyrmyz. Qoǵamdyq keńespen birge úlken jumys atqaryldy. Olar kóptegen oryndardy aralap, shyǵarmashylyq úıirmeler bolsyn, sporttyq seksıalar bolsyn, mundaı qyzmetterdiń qandaı jaǵdaılarda kórsetiletinin qarap shyqty», – dedi Erbolat Dosaev jýrnalıserdiń suraǵyna jaýap bere otyryp.
Ákimniń aıtýynsha, bıyldyń sońyna deıin seksıalar men úıirmelerge qatysýdy baqylaýdy kúsheıtý maqsatynda Face ID júıesine tolyqtaı kóshý aıaqtalady.
Baǵdarlamany qarjylandyrýǵa keletin bolsaq, 2025 jyly búdjet bıylǵy deńgeıde saqtalady. Qazirgi ýaqytta qarajat qalanyń 8 aýdanyna bólingen. Sonymen qatar, qazirgi ýaqytta balalar kontıngentiniń azaıýy baıqalýda. Bul óz kezeginde 2025 jyly kezekte turǵan balalardyń baǵdarlamaǵa qatysýyna múmkindik beredi.
«Biz jańa erejeler qabyldadyq, oǵan sáıkes vaýcherler merzimsiz bolmaıdy. Bir otbasy birneshe jyl boıy ony paıdalana bermeýi úshin kezek únemi jańartylyp otyrady», – dep qosty ákim.
Sondaı-aq, Erbolat Dosaev adal jetkizýshilerden jaqsy pikirler túsip jatqanyn aıtty.
«Adal emes jetkizýshilermen kelisimsharttardy toqtatyp jatyrmyz. Olar memlekettik satyp alý qatysýshysy bolýy kerek bolǵandyqtan, olardy adal emes jetkizýshiler tizimine engizý qıyn. Qazir osy máseleni sheship jatyrmyz, bolashaqta mundaı jetkizýshilerdi baǵdarlamaǵa qatystyrmaýǵa múmkindik bolady», – dedi Erbolat Dosaev.