1 qańtardan bastap qazaqstandyqtar saýsaq izderin tapsyrýǵa mindetteledi
Kelesi jyly 1 qańtardan bastap qazaqstandyqtar mindetti daktıloskopıalyq tirkeýden ótedi, dep habarlaıdy Almaty-akshamy.kz BAQ.KZ-ke silteme jasap.
Bul týraly İshki ister mınıstrliginde ótken aptalyq baspasóz máslıhatynda İİM Kóshi-qon qyzmeti komıtetiniń aǵa ınspektory Nurjan Jańabaev málimdedi.
Aıtýynsha, pasport pen jeke kýálikti alǵan kezde azamattardy mindetti daktıloskopıalyq tirkeý engiziledi.
Daktıloskopıalyq tirkeý - bul saýsaqtardyń papıllárlyq úlgileriniń qurylymdyq erekshelikteri týraly aqparat alý. Onyń maqsaty - adamnyń múddelerin qorǵaý, onyń zańdy quqyqtaryn, densaýlyǵy men qaýipsizdigin qamtamasyz etý. Birinshiden, bul is-sharalar jeke tulǵalardy bıometrıalyq sáıkestendirýdi jetildirýge baǵyttalǵan, bul óz kezeginde zańsyz qujattandyrý faktilerin boldyrmaýǵa, qujattardy qoldan jasaýdan, olardyń ıelerin alaıaqtyq jáne ózge de qylmystyq áreketterden qorǵaýǵa múmkindik beredi., - dep túsindirdi aǵa ınspektor.
Belgili bolǵandaı, daktıloskopıalyq tirkeý bizdiń azamattarymyzdyń basqa elderdiń memlekettik shekaralaryn kesip ótý rásimin jeńildetýdi kózdeıdi.
Bul kúndelikti ómirde de, jazataıym oqıǵalarda da, sonyń ishinde tehnogendik jáne tabıǵı sıpattaǵy jeke basyn kýálandyratyn qujattardy qalpyna keltirý rásimin jeńildetip qana qoımaıdy, sonymen qatar jedeldetedi. Bolashaqta daktıloskopıalyq aqparattyń arqasynda zamanaýı smartfondar arqyly memlekettik qyzmetterdi qashyqtyqtan alýdy odan ári damytý múmkindigi paıda bolady, - dedi Nurjan Jańabaev.
Daktıloskopıalyq tirkeý týraly neni bilgen jón:
• 12 jasqa deıingi balalardan basqa, Qazaqstan Respýblıkasynyń barlyq azamattary jáne Qazaqstan Respýblıkasynda turaqty turatyn sheteldikter daktıloskopıalyq tirkeýge jatady;
• 12 jastan 16 jasqa deıingi balalar erikti negizde daktıloskopıalyq tirkeýge jatady;
• Saýsaq izderin alý HQKO-larda jeke kýálikterdi, pasporttardy, Sheteldiktiń turýǵa yqtıarhattaryn jáne azamattyǵy joq adamnyń kýálikterin resimdeý kezinde júrgiziletin bolady.