«Coursera» bilim berý platformasynyń 654 kýrsy qazaq tiline aýdarylyp jatyr.
Bul jobanyń alǵashqy nátıjeleri jemisin bere bastady. Dál qazirgi ýaqytta 50 kýrs qazaq tiline aýdarylyp, stýdentterge usynyldy. Joba sertıfıkatyn alǵashqylardyń biri bolyp pavlodarlyq Kamıla Aqanqyzy aldy, dep habarlaıdy Almaty-akshamy.kz Egemen.kz-ke silteme jasap.
Toraıǵyrov ýnıversıtetiniń 4-kýrs stýdenti Kamıla Aqanqyzy «Qorshaǵan ortany qorǵaý jáne adam tirshiliginiń qaýipsizdigi» mamandyǵy boıynsha bilim alady. Platforma katalogyndaǵy kýrstar ony qatty qyzyqtyrǵan. Bul týraly ol: «San túrli kýrstardy kórip, ótkenshe asyq boldym. Bári de qyzyq. Bári de paıdaly. İshinen sońǵy ýaqytta ózimdi alańdatyp júrgen máselege qatysty kýrs kórgende qýanyp kettim. Sosyn oılanbastan «XXI ǵasyr jumys ornyndaǵy qarym-qatynas» kýrsyn óttim. Sóıtip alǵashqy sertıfıkatymdy da aldym», - dedi.
«Coursera» katalogynda álemniń 170 úzdik ýnıversıteti men 75 jetekshi kompanıa usynǵan 10 myń kýrs bar. Bul kýrstardyń barlyǵy «Coursera – qazaq tilinde» jobasynyń arqasynda qazaq stýdentterine qoljetimdi. Jobanyń qazaq qoǵamyna jetkeni tek stýdentterdi ǵana emes, oqytýshylardy da qýantty.
Qazaq qoǵamyn tereń bilimge jeteleıtin jobaǵa Kamıla oqıtyn Toraıǵyrov ýnıversıtetiniń Bıologıa jáne ekologıa kafedrasynyń meńgerýshisi Qalıeva Aınagúl de óz pikirin bildirdi.
«Bul – stýdentterge jańa bilim men daǵdylardy ıgerýge múmkindik beretin aýqymdy bilim berý platformasy. Stýdentterge álemniń jetekshi ýnıversıtetteriniń tájirıbesin tegin meńgerýge múmkindik bergeni úshin mınıstrlikpen jobany aýdarǵan adamdarǵa alǵysymyzdy bildiremiz. Bizdiń stýdentter ózderi úshin kóptegen paıdaly aqparattardy alady dep oılaımyn», - dedi ol.
Qazirgi ýaqytta jobanyń senimdi seriktesi «BMG UpSkill» kompanıasy qalǵan 604 kýrsty kezeń-kezeńimen aýdaryp, daıyndap jatyr. Kamıla jobaǵa degen lebizin bildirdi.
«Qurdastarym da Coursera-nyń berip jatqan múmkindigine óte rıza. Sebebi kýrstar óte qyzyqty ári paıdaly. Platforma bilim alýshylarǵa óz bilimderin jetildirýge, tulǵa retinde damýǵa kómektesedi. Sondyqtan da kýrsqa qatysyp, ýaqytty tıimdy paıdalanýǵa shaqyramyn. 4-kýrs bolǵandyqtan, jumysqa qatysty ýaıymym basym. Osy kýrstan jumys ornyńda qıyndyqqa tap bolǵan jaǵdaıda ózińdi ustaý, kollektıvte jumys isteý, durys til tabysý, ózińdi, ózgeni zertteý sıaqty aqparattar alyp, meńgerdim. Buryn bul kýrs týraly múldem estimeppin. Dúnıe júzine qundy ilim taratyp júrgen bul platformany bizdiń elge ákelgen bastamashy toptarǵa razylyǵymdy bildirgim keledi», - dedi stýdent.