Petr Pavel motosıklmen jol apatyna túsip, aýrýhanaǵa tústi.
Ol Praga áskerı ýnıversıtetiniń gospıtalinde qysqa merzimdi baqylaýda bolady, dep habarlaıdy Almaty-akshamy.kz
VVS-diń habarlaýynsha, 62 jastaǵy prezıdenttiń jaraqaty «aýyr emes», degenmen onyń emdeý mekemesinde neshe kún bolatyny belgisiz.
Chehıa polısıasy bul oqıǵany tergep jatqan joq. Sebebi ol jolda emes, jabyq jarys jolynda bolǵanyn aıtty.
BAQ-tyń málimetine qaraǵanda, ol BMW R1200GS motosıklimen júrgen.
«Onyń jaraqattary aýyr emes. Biraq ol Praga áskerı ýnıversıtetiniń gospıtalinde qysqa merzimdi baqylaýda bolady», – dep habarlady Chehıa prezıdentiniń keńsesi.
30 mamyrda Chehıa prezıdenti Pragada NATO elderiniń syrtqy ister mınıstrlerimen kezdesýi josparlanǵan.
Petr Pavel byltyr Chehıa prezıdenti bolyp saılanǵan. Ol sol kezde qyzmetke kiriskennen keıin de motosıklmen júre beretinin, burynǵysha motosıkl júrgizýdi tastamaıtynyn, múmkindik bolyp jatsa, jumysqa mindetti túrde motosıklmen baratynyn aıtqan edi.