Almatynyń 8 aýdanynda jastardy jumysqa ornalastyrý maqsatynda «Career Day» bos oryndar jármeńkesi ótip 26 myńnan astam jasty qamtydy. Bul týraly Almatynyń Óńirlik komýnıkasıalar qyzmetiniń brıfıńinde Jastar saıasaty basqarmasynyń ókilderi men qalalyq Mansap ortalyǵynyń mamandary keńirek aıtyp berdi.
«Mansap kúnderi jumyssyz jastar, JOO, kolej jáne mektep túlekteri qatarynan 26 myńnan astam jasty eken qamtydy, kásibı taǵylymdamaǵa 3800 adam jáne odan ári jumysqa ornalasýmen 4900 adam shaqyryldy. Qalanyń úzdik spıkerleri túrli sheberlik saǵattaryn ótkizdi», - dedi qalalyq mansap ortalyǵynyń ókili Asqar Azamatov.
«Career Day»-ge barlyǵy 850 iri kompanıa qatysty, olar 10 myńnan astam bos oryn usyndy. Sonymen qatar, 35 JOO men 83-ten astam kolejder, spıkerler jáne kásibı baǵdarlanǵan mamamandar qatysty.
«NEET jastarynyń jumyspen qamtylýy jáne olardyń úlesin azaıtý qalanyń jastar saıasatynyń negizgi baǵyttarynyń biri bolyp tabylady. Sebebi, jastardy damytýdy qoldaý jónindegi Jol kartasynyń negizgi ındıkatory jyl saıyn 10 myń jasty jumysqa ornalastyrý bolyp tabylady», - dedi Jastar saıasaty basqarmasy basshysynyń orynbasary Ázız Qajdenbek.
Spıker atap ótkendeı, Jastar saıasaty basqarmasy Sıfrlandyrý basqarmasymen birlesip «Jobfair 365» tegin sıfrlyq platformasynyń test nusqasyn iske qosty.
«Platformanyń mindetteri jastar arasynan jumys berýshiler men jumys izdenshilerdi biriktirý, sondaı-aq artyq ákimshilik kedergilerdi boldyrmaý bolyp tabylady. Bul tásildi jasaý týraly bastamany joǵary oqý oryndarynyń mansap ortalyqtarynyń basshylary kóterdi. Búginde Qazaqstan Respýblıkasynyń 20 óńirinen 500 jumys berýshi tirkelgen, olar 1500 bos jumys ornyn ornalastyrdy, onyń ishinde eń suranysqa ıeleri: kólik jáne logıstıka salasyndaǵy 257 bos jumys orny jáne óndiris jáne aýyl sharýashylyǵy salasyndaǵy 222 bos jumys orny», - dep tolyqtyrdy spıker.
Sonymen qatar, Basqarmada jastardyń jumyssyzdyǵymen kúresý úshin 4 ózekti mamandyq boıynsha: qyzmet kórsetý salasynda ,IT-mamandyqtar boıynsha, qolóner mamandyqtary boıynsha jáne soft skils boıynsha jastarǵa arnalǵan qysqa merzimdi kýrstar iske qosyldy.
«Jańa daǵdylardy ıgerý jastarǵa perspektıvaly jáne qyzyqty mamandyqty tańdaýǵa, jumys tabýǵa, qoǵamdaǵy táýelsiz ómirge beıimdelýge jáne ózin-ózi júzege asyrýǵa múmkindik beredi. Búgingi tańda 3850 jas 14 kýrs boıynsha oqydy», - dep atap ótti Á Qajdenbek.
Basqarmanyń málimetinshe, Almatyda 14-35 jas aralyǵyndaǵy 682 myń jas nemese turǵyndardyń jalpy sanynyń 32% - y turady. Qalanyń 35 joǵary oqý orny men 83 kolejinde 255 myńnan astam stýdent oqıdy. Osy jyly aldyn ala derekter boıynsha JOO-lar 42 myńǵa jýyq, al kolejder 20 myńǵa jýyq stýdent bitiredi. Bul rette, ótken jyldardaǵy tájirıbe boıynsha túlekterdiń 80% - y Almatyda jumys tabýǵa tyrysady, al bitirgennen keıingi birinshi jyl ishinde 10 myńǵa jýyǵy jumyssyzdar qatarynda bolady. Bıylǵy I toqsanda NEET sanatyndaǵy jastardyń úlesi jastardyń jalpy sanynan 8,3% quraıdy (53 myńnan astam jas).