Taýardyń tutyný qaýipsizdigine qoıylatyn arnaıy tehnıkalyq retteý júıesi bar.
2021 jyly Qazaqstanǵa 41,2 mlrd AQSH dollaryna taýar ákelingen, dep habarlaıdy Almaty-akshamy.kz
Ótken jyly elimizge 41,2 mlrd AQSH dollarynyń taýary jetkizildi. Bul týraly QR Saýda jáne ıntegrasıa mınıstrligi tehnıkalyq retteý jáne metrologıa komıteti tóraǵasynyń orynbasary Qýanysh Elikbaev aıtty.
«Qazaqstan kóptegen elmen syrtqy saýda yqpaldastyǵyn júzege asyryp keledi. Máselen, ótken jyly elimizge 41,2 mlrd AQSH dollarynyń taýary ákelindi. Taýarǵa qoıylatyn basty talaptyń biri – ol qaýipsiz bolýy tıis. Bizdiń mindet - tutynýshylardyń qaýipsizdigin qamtamasyz etý. Taýardyń tutyný qaýipsizdigine qoıylatyn arnaıy tehnıkalyq retteý júıesi bar. Búginde olar 60-qa jýyq tehnıkalyq reglamentpen bekitilgen», - dedi Qýanysh Elikbaev BAQ ókilderimen ótken baspasóz máslıhatynda.
Onyń aıtýynsha, elimizge jetkiziletin tamaq ónimderi, jeńil ónerkásip, avtomobıl jáne basqa da taýarlar tehnıkalyq reglament boıynsha qabyldanady.
«Tehnıkalyq reglament boıynsha taýar óndirýshiler men jetkizýshilerge mindetti talaptar qoıylady. Olar taýardyń talapqa sáıkes keletindigin rastaýy kerek. Sodan soń taýardy Qazaqstan aýmaǵynda satýǵa, qoldanýǵa sertıfıkat beriledi. Búginde elimizde 400-den astam synaq zerthanasy jumys isteıdi. Sonymen qatar 90-ǵa jýyq taýardy sertıfıkattaý organy bar. Osy oraıda aıta ketetin jaıt, talap qoıýmen jáne sertıfıkat berýmen jumys bitpeıdi. Atalǵan talaptardyń oryndalýyn baqylaý qajet. Osy oraıda bizdiń komıtet jańa zań ázirledi, ol ótken jyldyń shildesinde kúshine endi. Zańda elge kelgen ónim men taýardy qalaı baqylaý kerektigi naqty kórsetilgen», - deıdi ol.