El turǵyndary qandaı aýrýlarǵa jıi shaldyǵady?
Qazaqstanda ótken jyly tynys alý organdarynyń aýrýlarynan 21 myńǵa jýyq adam qaıtys boldy, olardyń 195-i - bir jasqa deıingi náreste, dep habarlaıdy Almaty-akshamy.kz QazAqparatqa silteme jasap.
2021 jyly anyqtalmaǵan joǵarǵy tynys alý joldarynyń jedel ınfeksıasy eń kóp tirkelgen aýrý túri boldy. Bul dıagnoz 1,2 mıllıon adamǵa qoıylǵan. Odan keıin COVID-19: 870,8 myń adam juqtyrǵan, olardyń 832,8 myńy – ıdentıfıkasıalanǵan vırýs.
Sonymen qatar, jelsheshek (16,4 myń adam zardap shekti) pen jiti ishek ınfeksıalarynyń tobyna jatatyn syrqat (8,9 myń adam) túrleri kúrt artty. Odan bólek, 3,5 myń adamda AITV ınfeksıasy (adamnyń ımýnıtet tapshylyǵynyń vırýsy), 4,6 myń adamda sozylmaly vırýstyq gepatıtter, 2,3 myń adamda merez anyqtaldy. 18 jasqa deıingiler anyqtalmaǵan joǵarǵy tynys alý joldarynyń jedel ınfeksıasynan kóp zardap shekti - 627,5 myń bala. 538 baladan týberkýlez anyqtaldy.
Tynys alý organdarynyń aýrýlarynan 20,8 myń adam, juqpaly jáne parazıttik aýrýlardan 1,4 myń adam qaıtys boldy. Tynys alý organdarynyń aýrýlarynan qaıtys bolǵan balalar sany bir jylda 12,9% azaıyp, 195 boldy. Al juqpaly jáne parazıttik aýrýlardan kóz jumǵan balalar sany 26,8% azaıdy - 180 bala. COVID-19-ǵa keler bolsaq, óńirler arasynda vırýsty eń kóp juqtyrý jaǵdaıy Nur-Sultanda tirkelgen: 10 myń adamǵa 1118 jaǵdaı. Odan keıin Almaty (10 myń adamǵa 824 jaǵdaı) jáne Qaraǵandy (10 myń adamǵa 711 jaǵdaı) oblystary tur.