Jalpy somasy 1,5 mlrd teńge tólengen.
Ótken jyly prokýrorlar ýákiletti memlekettik organdarmen birlesip 68 kásiporyndaǵy 4 myń qyzmetkerge 1,5 mlrd teńge ala almaı júrgen jalaqysyn qaıtarǵan, dep habarlaıdy Almaty-akshamy.kz Bas prokýratýranyń baspasóz qyzmetine silteme jasap.
Aqparatqa sáıkes, jalaqy boıynsha bereshekti jedel óndirip alý úshin derekter almasý jolǵa qoıyldy, debıtorlarmen jumys júrgizilýde jáne boryshkerlerdiń múlkin izdeý júrip jatyr.
«Mysaly, «Tamyr» JSHS kompanıalar toby 243 qyzmetkerge 60 mln teńge qaryz bolǵan. Soltústik Qazaqstan oblysy prokýratýrasynyń usynýy boıynsha kásiporynmen qaryzdar tolyǵymen tólenip, al jumys berýshi ÁQBtK-niń 462-babynyń 3-bóligi boıynsha ákimshilik jaýaptylyqqa tartylǵan», - delingen habarlamada.
Sheteldik jumys kúshin tartatyn sharýashylyq júrgizýshi sýbektilerdiń jumyskerleriniń quqyqtaryn saqtaýy jeke baǵyt bolyp tabylady.
Bas prokýratýranyń habarlaýynsha, eń kóp taralǵan buzýshylyq otandyq jáne sheteldik mamandardyń eńbegine aqy tóleýdiń teńgerimsizdigi bolyp otyr.
Anyqtalǵan buzýshylyqtar boıynsha 66 usyný engizilip, 228 adam ákimshilik jaýaptylyqqa tartyldy. Budan basqa 72 mln teńgege aıyppul salynyp, ákimdiktermen 266 ruqsat qaıtaryp alyndy, 150 sheteldik azamat elden shyǵaryldy.
«Eńbek jaǵdaılarynyń qaýipsizdigi máseleleri de nazardan tys qalmaıdy. Prokýrorlardyń aktileri boıynsha 30 myń jumysshyǵa jalaqyǵa ústemeaqy belgilendi, 600-den astam qyzmetkerge ótemaqy tólendi, qorǵaý quraldarymen jáne arnaıy tamaqpen kezeń-kezeńimen qamtamasyz etý bastaldy, 22 birlik jabdyqtyń jumysy toqtatyldy. Ákimshilik jaýaptylyqqa 226 adam tartyldy», - dep málimdedi Bas prokýratýranyń baspasóz qyzmeti.