BUU Qazaqstandaǵy Turaqty úılestirýshisiniń keńsesi aldaǵy ýaqytta elimizdegi memlekettik ınstıtýttardy nyǵaıtý, adam quqyqtaryn qorǵaý máselelerine basa nazar aýdarady. Bul týraly BUU-nyń Qazaqstandaǵy Turaqty úılestirýshisi Mıkaela Frıberg-Storı QR Prezıdenti janyndaǵy Memlekettik basqarý akademıasynda ótken kezdesý barysynda aıtty, dep habarlaıdy Almaty-akshamy.kz
BUU-nyń Qazaqstandaǵy Turaqty úılestirýshisi Mıkaela Frıberg-Storı «BUU-nyń Qazaqstandaǵy Eldik komandasynyń qyzmetine sholý: negizgi baǵyttary men damý perspektıvalary» taqyrybynda dáris oqydy. Akademıanyń magıstranttary men doktoranttaryna, qyzmetkerlerine elimizdiń turaqty damý salasyndaǵy kúsh-jigeri jáne onyń halyqaralyq arenadaǵy róli týraly aıtyp berdi.
Mıkaela Frıberg-Storı hanymnyń aıtýynsha, BUU Qazaqstan Úkimetimen, azamattyq qoǵammen birlese otyryp, basty nazar aýdaratyn úsh negizgi baǵytty aıqyndaǵanyn aıtty.
«Birinshiden, árbir jeke tulǵanyń bolashaǵy úshin qajetti bilim alýǵa, daǵdylardy meńgerýge múmkindik jasaýǵa basty nazar aýdaramyz. Buǵan bilim berýmen qatar, kásipker áıelderdi oqytý máselesi de kiredi. Ekinshiden, memlekettik ınstıtýttardy nyǵaıtýǵa, adam quqyqtaryn qorǵaýǵa basa nazar aýdarý mańyzdy. Túıtkildi máselelerin sheshýde adamdardyń memlekettik qyzmetkerlermen durys baılanys ornatýy da mańyzdy másele. Sonymen qatar túrli mekemelerdiń, jergilikti atqarýshy organdardyń kásibı deńgeıin arttyrý – basty baǵytymyzdyń biri. Úshinshiden, turaqty ekonomıkalyq ósim men klımattyń ózgerýi máselelerin sheshýge qoldaý kórsetemiz», – dep túsindirdi BUU-nyń Qazaqstandaǵy Turaqty úılestirýshisi.
Memlekettik qyzmetshilermen kezdesýge BUU-nyń Turaqty úılestirýshisi keńsesiniń ókilderi: RCO Kazakhstan tobynyń jetekshisi Kýrtmolla Abdýlganıev, RCO Kazakhstan seriktestik qarym-qatynasty damytý jónindegi koordınatory Dına Hasenova da qatysty.