Bıyl taǵy 55 eldi meken gazben qamtylady. Bul týraly búgin Úkimet otyrysynda Energetıka mınıstri Bolat Aqsholaqov aıtty, -dep habarlaıdy Almaty-akshamy.kz astanatv.kz-ke silteme jasap.
«Gazdandyrýdyń bas sqemasyn qarjylandyrý búdjet qarajaty, gaz jáne gazben jabdyqtaý salasyndaǵy ulttyq operator – «Qazaqgazdyń» kirisi jáne Qazaqstan Respýblıkasynyń zańnamasynda tyıym salynbaǵan ózge de qarjy kózderi esebinen júzege asyrylady. Jobalardy búdjetten qarjylandyrýdyń ulǵaıýy gazben jabdyqtaý deńgeıin 11 paıyzǵa nemese 2018 jyldan bastap qosymsha 2,6 mln adamnyń gazǵa qol jetkizýine múmkindik berdi», - dedi ol.
Mınıstrdiń dereginshe, bıyl 76 jobany iske asyrýǵa 73,9 mlrd teńge qarastyrylǵan.
«Bul 160 myń turǵyny bar 55 eldi mekendi gazben qamtamasyz etýge múmkindik beredi. 2023 jyldyń sońynda el boıynsha gazben jabdyqtaý 60 paıyz deńgeıinde kútilýde», - dedi Bolat Aqsholaqov.