Túrkimenstannyń burynǵy prezıdenti Gýrbangýly Berdimuhamedovtyń úlken qyzy Ogýljahan Atabaeva ákesiniń atymen atalǵan qaıyrymdylyq qorynyń emdeý qyzmeti boıynsha vıse-prezıdenti bolyp taǵaıyndaldy, dep habarlaıdy aqshamnews.kz Turkmen.news. silteme jasap.
Atalǵan qor kómekke muqtaj balalarǵa qoldaý kórsetýmen aınalysady. Bul sheshim 7 jeltoqsanda Arkadag qalasynda ótken qor basqarmasynyń otyrysynda qabyldandy.
Buǵan deıin Ogýljahan Atabaeva men onyń jubaıy Dovlet Atabaev Ulybrıtanıada turǵan. Atabaev Londonda Túrkimenstan elshiliginiń keńesshisi bolyp qyzmet atqarǵan. 2019 jyly erli-zaıyptylar kúlkili jaǵdaıǵa tap boldy: jergilikti velosıpedshi Atabaevtyń kólik júrgizip otyryp telefon qoldanǵanyn vıdeoǵa túsirip, eskertý jasaǵan edi.
Qazir erli-zaıyptylar Túrkimenstanǵa oraldy. BAQ málimetinshe, Atabaev formaldy túrde Memlekettik qurylys komıtetiniń tóraǵasynyń keńesshisi retinde tirkelgenimen, shyn máninde Arkadag qalasyndaǵy medısınalyq nysandardy qadaǵalaıdy.
Aıta keteıik, Arkadag – Túrkimenstannyń negizgi jobalarynyń biri, onda Berdimuhamedovtar otbasy belsendi túrde atsalysýda. Atabaevanyń taǵaıyndalýy bul áýlettiń eldegi yqpaly áli de aıtarlyqtaı ekenin kórsetedi.