Ánshi Aıqyn Tólepbergen "Qazaqstan avtorlyq qoǵamynyń" (QazAQ) ártisterdiń shyǵarmashylyǵy arqyly mol tabys taýyp, biraq ózderine úles bermeıtinin ashyq aıtty, dep habarlaıdy aqshamnews.kz
Ótken aıdan bastap Instagram áleýmettik jelisinde qazaqstandyq ártisterdiń ánderin paıdalaný shekteldi. Bul Meta kompanıasy men QazAQ arasyndaǵy yntymaqtastyqtyń toqtaýyna baılanysty boldy.
Aıqyn Tólepbergen Kanat Beıseqeevke bergen suhbatynda QazAQ jumysynyń ashyq emestigin synǵa aldy:
"Qazaqstan avtorlyq qoǵamy mıllıardtaǵan teńgeni jınaǵanymen, ártister óz úlesin kórmeıdi. Tipti karaoke-barlar úlken somalar tóleıdi, biraq bul aqshanyń qaıda ketetini beımálim."
Ánshiniń aıtýynsha, batys elderinde ártister turaqty syıaqy alsa, Qazaqstanda jaǵdaı múlde basqasha.
"Bular Instagram-dy qurtýǵa deıin jetti, tek ózderi kóbirek tabys taýyp, bizge eshteńe bermeý úshin. Olardyń esepshotynda mıllıardtaǵan teńge jatyr. Mysaly, meniń dosymnyń karaokesi bar, ol aı saıyn 500 myń teńge tóleýi kerek. Biraq kerekti adammen kelisip, qolma-qol 200 myń berip qutylady. Árıne, barlyǵyn birdeı kinálaı almaımyn, biraq astyrtyn máseleler óte kóp", – dedi Aıqyn.