ÓKQ brıfıńinde sóılegen sózinde Almaty qalasy Memlekettik kirister departamenti basshysynyń orynbasary Zańǵar Shyndalı tólemdi óz shottaryna qabyldaıtyn daıashylardyń mobıldi aýdarymdary tekserile me degen saýalǵa jaýap berdi.
Qala turǵyndary qoǵamdyq tamaqtandyrý oryndarynda daıashylar tólemderdi óz nómirlerine mobıldi aýdarymdar arqyly qabyldaıtynyn aıtýda, dep habarlaıdy almaty-akshamy.kz. Osy rette budan soń olardy deklarasıalaýdyń qajeti joq pa jáne kafe men meıramhana ıeleri osylaısha kiristerin jasyryp otyrǵan joq pa degen suraq týyndaıdy.
«Aýdarymdarmen, ásirese úshinshi tulǵalardyń shottaryna qabyldaý durys emes. Munda kiristi jasyrý faktileri bolýy múmkin. Sebebi daıashy meıramhana ıesiniń kásipkerlik qyzmetimen eshqandaı baılanysy joq. Sondyqtan munda birinshi kezekte tólemniń POS-termınaldar arqyly nemese qolma - qol aqshamen bolýyn talap etý qajet jáne mindetti túrde chekter talap etilýi tıis», - dep jaýap berdi Z.Shyndalı.
Sonymen qatar, meıramhana ıesi osy arqyly óz jumysshylaryna qaýip tóndiredi, óıtkeni daıashylarǵa aýdarymdardy tekserý kezinde suraqtar týyndaýy múmkin.
Brıfıń barysynda memlekettik kirister departamentiniń ókilinen: eger aýdarymdarda alýshyǵa «qaıyrymdylyqqa» nemese «kómekke» habarlama jazylsa, bul qosymsha tabys bolyp sanalmaı ma degen saýal qoıyldy.
«Joq, eseptelmeıdi. Sebebi bizde qaıyrymdylyqqa salyq salynbaıdy», - dep jaýap berdi Z. Shyńdáli.
Esterińizge sala keteıik, 2024 jyldyń 1 qańtarynan bastap Qazaqstanda kásipkerlik qyzmet belgileri bar azamattardyń mobıldi aýdarmalary tekserile bastady.