Almaty-akshamy.kz saıtynda búgin jaryq kórgen jańalyqtar legi – kún kerýeni
Almatyny qardan arshý qıyn bolyp tur
Qar jaýǵanǵa deıin aldyn ala negizgi magıstraldyq kósheler suıyq reagenttermen óńdelgen. Kóktaıǵaqtyń aldyn alý maqsatynda saǵat 05:00-den bastap 126 qum taratqysh arqyly kóktaıǵaqqa qarsy materıaldar (KQM) sebildi. Saǵat 09:00-degi jaǵdaı boıynsha 386 tonna KQM paıdalanyldy. Trotýarlar men jalpy paıdalanylatyn oryndar, qoǵamdyq kólik aıaldamalary men jer ústi jaıaý júrginshiler ótkelderi qolmen kúrelip jatyr.
Metro nege istemeı qaldy?
Keptelisi bitpeıtin Almaty úshin metro tıimdi, jyldam kólik bolyp turǵany ras. Búgin tańǵy ýaqytta Raıymbek beketinde aqparattyq baılanys jelisiniń jumysynyń aqaýyna baılanysty metro poıyzdary qolmen basqarý rejımine aýystyryldy. Soǵan baılanysty barlyq beketterde poıyzdardyń júris ıntervaly ýaqytsha uzardy. Mamandar jóndeý jasap, kóp uzamaı úırenshikti ınterval qaıta qalpyna keltirildi.
Oksford qazaq tilin oqıdy
Bul týraly Qazaqstan Respýblıkasynyń Ǵylym jáne joǵary bilim mınıstrligi men Oksford ýnıversıteti arasynda kelisimge qol qoıyldy.
«Til – halqymyz úshin basty qundylyqtardyń biri. Búgin qazaq jáne aǵylshyn tilindegi Oxford Qazaq sózdigin tanystyra otyryp, biz jańa tarıhı beleske kóterilemiz. Sonyń arqasynda álem jurtshylyǵy bizdiń mádenıetimiz ben halqymyzdyń tarıhy týraly mol málimet biletin bolady. Biz qazaq tilin tek qaǵaz júzinde ǵana emes, memlekettik tildi damytýdy sıfrlandyrý arqyly belsendi túrde júzege asyramyz», dedi Bilim jáne ǵylym mınıstri.
Almatydan qaıtarylǵan afrıkalyqtar
Olar Qazaqstanda júrgen kezinde kóshi-qon zańnamasyn buzǵan, atap aıtqanda, zańnamada belgilengen merzimde Qazaqstan Respýblıkasynyń aýmaǵynan shyqpaǵan. Qazaqstan Respýblıkasynyń kóshi-qon zańnamasyn buzǵany úshin ustalǵan Afrıka qurlyǵy elderiniń 19 azamaty óz elderine qaıtaryldy.
Qazaqstandyqtarǵa qolaıly ýaqyt beldeýi anyqtaldy
Tabıǵı ýaqytqa jaqyn eń ońtaıly nusqa osy boldy. 2024 jyldyń 1 naýryzynan bastap Qazaqstan Respýblıkasynyń búkil aýmaǵynda 5-shi saǵattyq beldeý (UTC +5) qoldanylady. Medısına, fızıologıa, geografıa, metrologıa salalarynyń mamandary byltyr jyl boıy Qazaqstan aýmaǵynda qolaıly ýaqyt beldeýin belgileý máselesin zerttep, osyndaı sheshimge kelgen.
Sýǵa jeli saldyrǵan...
Kaspıı teńiziniń tabany arqyly baılanys jelisi salynady. Prezıdentke Qazaqstan men Ázerbaıjan arasynda Kaspıı teńiziniń tabany arqyly Transkaspıı talshyqty-optıkalyq baılanys jelisin salý jobasynyń iske asyrylý barysy tanystyryldy. Bul joba Qazaqstannyń asa mańyzdy óńirlik telekomýnıkasıalyq habqa aınalýyna, el aýmaǵynan ótetin halyqaralyq trafık tranzıtin ulǵaıtýǵa múmkindik beredi.
Almatyda Atatúriktiń eskertkishi ashyldy
Bıiktigi 3 metrden turatyn qola eskertkishtiń tuǵyry granıtten jasalǵan. Eskertkishtiń avtorlary qazaqstandyq músinshiler - Aıdos Búrkitbaev pen Tımýr Ermuhametov. Eskertkish «Atatúrik skverinde» ornatyldy.
Almatydaǵy kólik aǵynyna ne áser etedi?
Almatyda jer asty dúmpýi tirkelgen kúni Sergek ITS júıesiniń derekteri qalada kólik qozǵalysynyń kúrt óskenin kórsetti. Qozǵalys belsendiligi orta eseppen 4,5 esege artyp, túngi saǵat 01:00-de sharyqtaý shegine jetip, tek tańǵy saǵat 5-te ǵana qalypty jaǵdaıǵa oralǵan. Jer silkinisinen keıingi alǵashqy saǵatta qala joldaryndaǵy biregeı kólikterdiń sany 40%-ǵa artyp, kelesi saǵatta maksımým 208 myń birlikke jetti. Bul ótken aptanyń dál osy ýaqytymen salystyrǵanda 267%-ǵa artyq. Qaladan shyqqan kólikter sany da 152%-ǵa ósken, eń úlken ósim 01:00 men 02:00 aralyǵynda 239%-dy qurady. Sonymen qatar, Almatyda 23 qańtarda birinshi aýysymyndaǵy synyp oqýshylary úshin sabaqtardyń toqtatylýyna baılanysty tańerteńgilik kólik qozǵalysy tómendelgeni tirkelgen. Alaıda, ortasha jyldamdyq 25 paıyzǵa artqan.
Almatydan qaı úıdi satyp alýǵa bolmaıdy?
Qala qurylysyn baqylaý basqarmasynyń málimetinshe, búginshe bul tizimde 45 turǵyn úı kesheni bar. Tizimge qurylysy áli bastalmaǵan ruqsat qujaty joq nysandar da kirdi. Basqarmanyń dereginshe, osyndaı TÚK boıynsha usynystar ınternet resýrstardyń monıtorıńi nátıjesinde anyqtalady. Jyljymaıtyn múlikti satyp almas buryn Almaty qalasy Qala qurylysyn baqylaý basqarmasynyń +7 705 89 66 000 WhatsApp anyqtamalyq jelisi boıynsha TÚK qujatynyń bar-joǵyna kóz jetkizýge bolady.