Reseı Federasıasynan kelgen baıqaýshylar mısıasynyń quramyndaǵy sarapshylar Almatydaǵy saılaý barysyna daıyndyqtyń joǵary deńgeıde ekenin atap ótti.
Mısıa quramy Almatydaǵy 10 saılaý ýchaskesin aralap shyqty, dep habarlaıdy Almaty-akshamy.kz.
«Bizdiń mısıa taǵaıyndalǵan kúnnen bastap saılaý barysyn jiti baqylap otyrdy. Biz saılaý komısıalary men saılaýshylardyń bul naýqanǵa qanshalyqty daıyn ekenin kórdik. 10-nan astam ýchaskelerdi araladyq. Osynsha mólsherdegi táýelsiz, ishki qazaqstandyq baıqaýshylardy kópten beri barlyq saılaý ýchaskelerinen kórmegen edik. Eń azy 9 adam, bir ýchaskede 25 adam boldy. Bul tek partıalardan, kandıdattar atynan bolǵan baıqaýshylar», - dedi Reseı Federasıasynyń Almatydaǵy Bas konsýldyǵynyń konsýl-keńesshisi Artem Oganov.
Saılaý barysyna MGIMO (RF) halyqaralyq zertteýler ınstıtýty Eýroazıattyq zertteýler ortalyǵynyń jetekshi ǵylymı qyzmetkeri Knázev Aleksandr Alekseevıch joǵary baǵa berdi. Sarapshy daýys berý qorytyndysy saılaý barysynan áldeqaıda mańyzdy degen pikir bildirdi.
«Meniń oıymsha, saılaýdyń ózinen de mańyzdysy – onyń nátıjesi. Bul Parlamenttiń jańa palatasyn qurý, onyń quramy burynǵysyna qaraǵanda Qazaqstan Prezıdenti júrgizip jatqan reformalarǵa kóbirek sáıkes keledi», - dedi ol.
Sarapshylardyń oıy bir jerden shyǵyp, olar saılaý úderisiniń ashyqtyǵyn jáne saılaý komısıalarynyń biliktiliginiń joǵary deńgeıin atap ótti. Spıkerler sonymen qatar kedergisiz ortasy bar saılaý ýchaskeleriniń baryna da nazar aýdardy.