Almatyda sozylmaly búırek jetkiliksizdigi bar naýqastardy emdeýde jańa múmkindikterge jol ashyldy
Medısına áleminde emdeý ádisteri únemi jetildirilip otyrady. Dıalız fıstýlalaryn rentgenendovaskýlárlyq qaıta ózekteý baǵyty da ýaqyt kóshinen qalmaı keledi. Almaty qalasynda ótken «sheberlik sabaǵy» aıasynda endovoskýlárly hırýrg-dárigerler men nefrologtar úshin 6 biregeı ota jasaldy. Bul otalar barysynda durys jumys istemeıtin dıalız fıstýlalary bar naýqastardy emdeýdiń ınovasıalyq tásili kórsetildi.
Atalǵan tásil megapolıstegi Ortalyq qalalyq klınıkalyq aýrýhanada alǵash ret kórsetildi. Bul ádis sozylmaly búırek jetkiliksizdigi bar naýqastardy emdeýde jańa múmkindikterge jol ashady. Almaty qalasynda sozylmaly dıalızge táýeldi pasıentter sanynyń óte kóp bolýy qazirgi kezde qoldanylyp júrgen arterıalyq-qan tamyrlyq fıstýlalardy paıdalanýdyń áli de ózekti ekeniniń dáleli.
Dıalız fıstýlasy – sozylmaly búırek jetkiliksizdigi bar naýqastarda dıalızdy júzege asyrý úshin qanaınalym júıesine qol jetkizýdi qamtamasyz etý maqsatynda arterıa men tamyrlyq qan tamyry arasyndaǵy, ádette bilek ne qoldyń joǵarǵy bóligindegi qosylýdy hırýrgıalyq jolmen jasaý.
Dıalız fıstýlasy aǵzadan qan alý, ony toksınder men artyq zattardan tazartý, sodan keıin denege qaıta oralý múmkindigin qamtamasyz etý úshin jasalady. Bul ádis búırek qyzmeti shekteýli nemese jetispeıtin naýqastardyń ómirlik belsendiligin saqtaý úshin qoldanylady. Dıalız fıstýlasyn qurý dıalız prosedýralaryn júrgizýdiń senimdi jáne qoljetimdi jolyn anyqtaýǵa múmkindik beredi, bul medısınalyq kómektiń osy túrine muqtaj naýqastardyń ómir súrý sapasyn edáýir jaqsartady.
Gemodıalız naýqastaryna arnalǵan arterıo-venozdyq (dıalız) fıstýla ekinshi júrek bolyp tabylady. Óıtkeni ol arqyly ǵana biz gemodıalız alatyn naýqastarymyzdyń ómirin saqtap qalamyz. Kóbine fıstýlalar jabylyp qalyp, óz jumysyn toqtady, sodan keıin naýqasqa fıstýlany basqa jerde jasaý kerek bolady. Bul onyń qolyn taǵy da basqa jerden kesý, jańa hırýrgıalyq aralasýdy bildiredi ári jańa fıstýla uzaq ýaqyt jumys isteıtindigine eshqandaı kepildik joq. Kóptegen naýqastyń jyldar boıy gemodıalız alatynyn eskersek, dıalız fıstýlalaryn jabylǵan kezde qoldy basqa jerden kesýge týra keletini anyq. Nátıjesinde naýqastyń qolynda AV-fıstýlalar úshin saý oryn qalmaıdy jáne turaqty kateterler ornatylady, bul óz kezeginde máseleniń ýaqytsha sheshimi ǵana (kateter ınfeksıasy qaýpi bar – sepsıs, tromboz).
– Bizdiń dárigerler úshin bul «sheberlik sabaǵy» medısınalyq qaýymdastyq arasynda osy ozyq emdeý ádisterin engizýdiń qýatty quralyna aınaldy. Ol jańa perspektıvalar ashty jáne endovaskýlárlyq hırýrgıa salasyn damytýǵa ıtermeledi, nátıjesinde sozylmaly búırek jetkiliksizdiginen zardap shegetin kóptegen naýqastyń ómir súrý sapasy jaqsarady. Osy «sheberlik sabaǵynyń» arqasynda fıstýlanyń ótkizgishtigin qalpyna keltirýdi jáne onyń fýnksıonaldyǵyn múmkindiginshe uzaq jyldarǵa uzartýdy úırendik. Bizde bul otany qajet etetin alty pasıent boldy. Sol naýqastardyń bárine atalǵan otany jasadyq jáne bári sátti ótti. Endi biz aýrýhanada osyndaı otany únemi jasaıtyn bolamyz, – deıdi dáriger Sultan ILIEV.
Endovaskýlárlyq qaıta ózekteý arterıovenozdy fıstýlalardyń qyzmet etý merzimin uzartýdyń negizgi núktesin bildiredi. Bul sozylmaly búırek jetkiliksizdigine tap bolǵan kóptegen naýqastyń ómir súrý sapasyna baılanysty.
Osy ádistiń arqasynda naýqastar arterıo-venozdy fıstýlany qoldaný merzimin barynsha uzartýǵa múmkindik alady. Al bul olardyń kúndelikti ómirine úlken áser etedi.
«Sheberlik sabaǵy» I.I.Mechnıkov atyndaǵy Sankt-Peterbýrg soltústik-batys memlekettik medısına ýnıversıteti ýnıversıtettik klınıkasynyń dárigeri, endovaskýlárlyq jáne qan-tamyrlary hırýrgy Shamıl Asadýllaevtyń qatysýymen ótti.