«Buǵylar úıirge erte tússe, qys aıaǵy sozylmaıdy, kesh tússe qys sozylyńqy bolady» degen boljam bar
«Buǵynyń moıyn jýary» búginnen bastalyp, qazan aıynyń 25-ine deıin sozylady. Osy mezgilde buǵynyń túgi túsip, moıny jýandap semiredi, adamnyń kózin tartatyndaı sulý kúıge enedi. Buǵynyń osy ózgeristerine negizdelip bul mezgildi babalarymyz "buǵynyń moıyn jýary" dep atasa kerek. Keı derekterde «buǵynyń moıyn jýary buǵynyń taý basyndaǵy qarǵa moıynyn súıkep jýǵanyn meńzeıdi» deıdi. Sonymen qatar, osy mezgildiń «Buǵynyń moıyn jýandaýy» degen de ataýy da bar ekenin umytpaǵan maqul.
Osy kezde buǵylar úıirge túsýge jaraı bastaıdy. Amal júrip jatqan kezde taý toǵaılarynda, ózen, kól jaǵalaýlaryndaǵy ashyq alańqaılarda buǵylardyń úıirge túser aldyndaǵy maıdany ótedi. Eń myqtysy ǵana úıirge túsedi. Ózara shaıqasýynan nemese tastarǵa soǵylýynan múıizderi synady, ańshylar men malshylar orman-toǵaıǵa baryp buǵy múıizderin teretin bolǵan.
Qazekeń buǵynyń úıirge túsýine erekshe kóńil bólgen. Soǵan qarap aýa raıyna boljamdar jasaǵan: eger buǵylar úıirge erte tússe, qys aıaǵy sozylmaıdy, úıirge kesh tússe, qys aıaǵy sozylady dep paıym jasaǵan. Qasqyrdyń uıyǵýy, ıttiń túleýi sıaqty kórinisterge de kóńil bólgen. It balaǵynan túlese oıdyń qysy bolady, jonynan túlese taýdyń qysy bolady dep paıymdaǵan. Árıne, boljamdary aına- qatesiz kelip otyrǵan.
Ótken paıymymyzda almatylyqtarǵa jyly kıinýge áli erte dep jazǵanbyz. Bulaı dep batyl aıtýymyzǵa aıdyń alshysynan týýy sebep bolǵan edi. Sol aıtqanymyz shetinen kelip jatyr. Bir-eki kúngi salqyndyq bolmasa, kún áli sýyta qoıǵan joq. Shybyn-shirkeıler, ózge de dala jándikteri jazdaǵydaı tirshilikterin jasap jatyr. Kúzdiń shýaqty bolatynyn, uzaqqa sozylatynyn osy kórinisten-aq ańǵarýǵa bolatyn sıaqty.
Búgin qoldanystaǵy kúntizbe boıynsha, qazannyń – 20-sy, aı júıesine súıener bolsaq, – 24-i, qazaqsha aıdyń – 10-y.
Joǵaryda aıtqanymyzdaı, «Buǵynyń moıyn jýary» amaly júrip jatqandyqtan, Almatyda aldaǵy aptada jyly kúnder arakidik jalǵasyn taba beredi, biraq qatary sıreksıdi. Jańbyr men qar kórinis beredi. Buǵan qarap kúz bitti deýge kelmeıdi, aspan ashyq, kún jaıdary, shýaqty sátter áli bar alda...