Bıyldan bastap 14-23 naýryz aralyǵynda halyqtyq merekeni toılaýǵa arnalǵan Naýryznama onkúndigi jarıalandy.
Onkúndiktiń besinshi kúni ulttyq kıimge arnaldy, dep habarlaıdy Almaty-akshamy.kz
Osy 10 kúnde Qazaqstan aýmaǵynda 400-ge jýyq is-shara ótedi dep josparlanǵan.
Ulttyq kıimge arnalǵan bul kún ata-babamyzdy, urpaqtan-urpaqqa jalǵasyp kele jatqan ádet-ǵuryptardy eske alatyn erekshe kezeńge aınalady. Bul – halyq rýhynyń shaǵylysyn beıneleıtin ulttyq dızaınnyń kórkemdigi men qaıtalanbas órnegine tamsanyp, bul ónerdegi baı murany zerttep, odan shabyt alatyn kún.
Ǵasyrlar boıy qazaqtyń ulttyq kıimi qarapaıymdylyǵymen jáne utymdylyǵymen erekshelenip keldi, tipti zamanaýı sán talǵamy da onyń mańyzyn kemite almaq emes. Ulttyq kıim úlgisinde paıdalanylatyn bylǵary, jún, kıiz, mata sıaqty tabıǵı materıaldar adamǵa jylýlyq pen jaılylyq syılaýmen qatar, kıim ıesiniń ataq-dárejesin, baılyǵyn kórsetetin.
Qazirgi modernızasıa dáýirinde ulttyq kıimniń máni jańa sıpat aldy: burynǵy dástúrler men qazirgi úrdisterdi biriktire otyryp, jańa ınterpretasıaǵa ıe boldy.
Qazirgi zamanǵy ulttyq kıim ulttyq minez pen ult birligin aıshyqtaı otyryp, el mádenıeti men tarıhynyń ajyramas bóligine aınaldy.