Búginde 250 myńnan asa balalar men jasóspirimder "Jas sarbaz" respýblıkalyq balalar-jasóspirimder qozǵalysynyń quramyna kiredi
Qorǵanys mınıstriniń 2021 jylǵy 5 mamyrdaǵy buıryǵymen elimizdiń Qarýly kúshterinde mádenıet jáne óner qyzmetkerleriniń kásibı merekesi bekitilgen bolatyn. Ol mamyrdyń ár tórtinshi jeksenbisinde atap ótiledi, dep habarlaıdy Almaty-akshamy.kz.
Shyǵarmashylyq ókilderi óskeleń urpaqty tárbıeleýde, Qazaqstannyń tarıhı murasyn dáripteýde, áskerı qyzmetshilerdiń boıyndaǵy patrıotızmdi damytýda jáne jaýyngerlik rýhyn arttyrýda mańyzdy ról atqarady. Qarýly Kúshterde bul salada 2015 jyly qurylǵan Ulttyq áskerı-patrıottyq ortalyǵy qyzmet etip keledi.
Elordadaǵy bul kópfýnksıonaldy mekemeniń quramynda Ortalyq ansámbl, Ortalyq áskerı orkestr jáne Qarýly kúshterdiń Memlekettik áskerı-tarıhı mýzeıi bar. Jastardy áskerı-patrıottyq turǵyda tárbıeleýdegi aýqymdy jumysty Ulttyq áskerı-patrıottyq ortalyǵynyń Almaty fılıaly da júrgizýde. Sonymen qatar Qarýly Kúshterdiń basqa da garnızondarynda osyndaı mekemeler qurý josparda bar.
Búginde 250 myńnan asa balalar men jasóspirimder "Jas sarbaz" respýblıkalyq balalar-jasóspirimder qozǵalysynyń quramyna kiredi. Balalar áskerı-patrıottyq klýbtarda, "Jas sarbaz" synyptarynda jáne Smart Sarbaz úıirmelerinde áskerı istiń negizderin meńgerýde. Elorda men Almatynyń Ulttyq áskerı-patrıottyq ortalyǵy janynan Qarýly kúshterdiń, basqa da áskerler men áskerı quralymdardyń áskerı qyzmetshileriniń balalaryna arnalǵan dombyra, vokal, horeografıa syndy shyǵarmashylyq stýdıalar ashylǵan. Olardyń ishindegi myqtylary jyl saıyn ótetin "Aıbyn" respýblıkalyq jastar jıynynda óz jetistikterin kórsetýge múmkindik alady.
Qazaqstandaǵy eń iri Memlekettik áskerı-tarıhı mýzeıde jıyrma myńnan astam eksponat saqtaýly. Olardyń arasynda Uly Otan soǵysynyń ardagerleri men belgili memleket qaıratkerleriniń urpaqtary syıǵa tartqan otbasylyq jádigerler de bar. Munda Bógenbaı, Aıdarbek, Qojabergen jáne basqa batyrlardyń qarý-jaraǵy men saýyt-saımandary saqtalǵan.
Bıylǵy jyly UÁPO janynan kóktemde áskerge shaqyrylǵan merzimdi qyzmettegi sarbazdardan shyǵarmashylyq vzvod quryldy. Áskerı boryshyn ótegen jastarǵa jańa múmkindikter ashylyp otyr. Olar JOO-ǵa jeńildikpen túse alady nemese Qarýly kúshterdiń shyǵarmashylyq ujymdarynda kelisimshart boıynsha qyzmetin jalǵastyrýyna bolady.
Óńirlerde 21 áskerı orkestr jumys isteıdi.
Halyqaralyq yntymaqtastyq sheńberinde bul ortalyqtyń ujymy Shanhaı Yntymaqtastyq Uıymyna múshe memleketterdiń "Beıbitshilik kerneıi" halyqaralyq áskerı orkestrler festıvaline, "Amýr tolqyny" halyqaralyq áskerı-mýzykalyq festıvaline (Habarovsk q., Reseı), V Halyqaralyq áskerı orkestrler festıvaline (Nanchan q., QHR), Halyqaralyq armıa oıyndaryna (q. Máskeý, Reseı) qatysty.
Armıanyń jaýyngerlik rýhy, onyń jaýyngerlik qabileti patrıotızmge jáne jaýyngerdiń Otan qorǵaýshynyń uly mısıasyna degen shynaıy senimine baılanysty. Qazaqstan Qarýly Kúshteriniń mádenıeti men óneriniń talantty ókilderi áskerdiń mańyzyn ónermen dáripteýge, nyǵaıtýǵa jáne bedelin kóterýge yqpal etip keledi.