Almatynyń irgesindegi Besaǵash eldi mekeninde balalardy sportqa qyzyqtyrý baǵytynda is-sharalar ótti, dep habarlaıdy Almaty-akshamy.kz.
Sharaǵa belgili sportshylar, London Olımpıadasynyń jáne Azıa birinshiliginiń altyn júldegeri Aqjúrek Tańatarov, Azıa chempıonatynyń qola júldegeri, boksshy Ferýza Sharıpova t.b. qatysty.
Jıynnyń maqsaty - jas óskeleń urpaqty myǵym, qýatty, shıraq bolyp ósýge úndeý. Sondaı-aq jastardy sport arqyly otanshyldyq rýhta tárbıeleý.
«Shara ósip kele jatqan jas býynnyń boıyndaǵy sportqa qumartýshylyǵyn oıatý bolyp esepteledi. Osy maqsatpen qarakózderimizdi jınap kishigirim jattyǵý uıymdastyryldy. Óıtkeni bolashaq chempıondar osy óskeleń urpaqtyń arasynan órbip shyǵady. Sondyqtan qazaq jastary jigerli, namysshyl, bilimdi ári sportty janyna serik etip ósse degen ıgi nıetimiz bar», - dedi London Olımpıadasynyń qola júldegeri Aqjúrek Tańatarov.
Búgingi jas urpaqty smartfonnan alshaqtatý qıyn bolyp tur. Bul qoǵamnyń ózekti máselesine aınalyp barady. Sol sebepti de sport osyndaı olqylyqtardyń ornyn toltyratyn kórinedi. Bul týraly boksshy Ferýza Sharıpova aıtyp berdi.
«Mundaı sporttyq is-sharalardy udaıy ótkizý kerek. Sonda ǵana balalarymyzdy smartfonǵa telmirýden alshaqtatamyz. Álemdik jarystarda top jaryp júrgen aǵa-ápkelerine qarap boı túzep, úlgi-ónege alsa, nur ústine nur bolady», - dep túıdi ol.