Qazaq eliniń Táýelsizdigine 30 jyl toldy
Osydan 30 jyl buryn 16 jeltoqsanda Joǵarǵy Keńes «Qazaqstan Respýblıkasynyń Memlekettik táýelsizdigi týraly» Konstıtýsıalyq Zańdy qabyldaǵan edi, dep habarlaıdy Almaty-akshamy.kz
Táýelsizdiktiń 30 jyldyǵynda Qazaqstan eleýli jetistikterge jetti jáne kúrdeli syn-qaterlerden ótti. Tól valútasyn qoldanysqa engizdi. Aıbyndy áskerin qurdy. Shekaralaryn bekitip, jańa astanasyn saldy. Memlekettik rámizderin bekitti. Ornyqty memlekettik ınstıtýttary bar jáne ekonomıkasy básekege qabiletti demokratıalyq memleket retinde qalyptasty. Álemdik saýda-ekonomıkalyq júıege tolyq enip, ózin senimdi seriktes retinde kórsete bildi.
Búginde álem boıynsha 120-dan astam el Qazaqstanmen dıplomatıalyq qarym-qatynas ornatqan. Bıylǵy mereıtoılyq jylda da elimizde aýqymdy reformalar bastaldy, ekonomıka men áleýmettik sala jańǵyryp keledi. Pandemıaǵa qaramastan, memleket otandyq bızneske qoldaý kórsetip jatyr. Halqymyzdyń sany 19 mıllıonnan asty. Qazaqstan KSRO taraǵannan keıin araǵa 8 kún salyp, táýelsizdigin jarıalady. Qazaqstannyń derbes el bolǵanyn álemge alǵashqylardyń biri bolyp «QazAqparat» halyqaralyq aqparat agenttigi (QazTAG) habarlaǵan edi.
«Táýelsizdiktiń bizdiń bárimizge artar mindeti mol. Endi eńseli el bolýdyń jolyna shyndap túsýimiz kerek. Áýletimizdiń asýy da, dáýletimizdiń tasýy da óz qolymyzda. Keń-baıtaq jerimizdiń baılyǵy osy dalanyń túpkilikti halqyna da, taǵdyr qosyp birge ómir súrip jatqan ózge ult ókilderine de molynan jetedi. Ne istesek te, aqylmen isteıik, arzan uranǵa ermeıik, ushpa sezimge erik bermeıik degim keledi», - dedi Elbasy Nursultan Nazarbaev 17 jeltoqsanda Almatydaǵy Ortalyq alańda Qazaqstan Respýblıkasynyń memlekettik táýelsizdigi jarıalanýyna oraı ótkizilgen jıynda.
Qazaqstannyń Táýelsizdigin resmı túrde eń alǵash Amerıka Qurama Shtattary moıyndady. Odan keıin Qytaı, Ulybrıtanıa, Mońǵolıa, Fransıa, Japonıa, Ońtústik Koreıa jáne Iran Islam memleketi Qazaqstandy táýelsiz memleket retinde tanydy. Al Túrkıa birinshi bolyp Qazaqstanda óz elshiligin ashty. QR Tuńǵysh Prezıdenti – Elbasy Nursultan Nazarbaev óziniń «Táýelsizdik taǵylymdary» atty maqalasynda ǵasyrlar toǵysynda el basqarý isi úlken senimmen qatar zor jaýapkershilik júktegenin aıtady.
«Osydan otyz jyl buryn biz sanaly túrde, óz dúnıetanymymyz ben bolmysymyzdyń negizi retinde bostandyq pen azattyqqa tańdaý jasadyq. Búginge deıingi bul merzim adamzat tarıhy úshin qas-qaǵym ǵana sát bolǵanymen, orda buzar jasqa endi tolǵan táýelsiz Qazaqstan úshin ol – úlken beles, asqaraly asý. Mundaıǵa tek rýhy kúshti, birligi bekem jurt qana qol jetkize alady», - dep jazdy N. Nazarbaev.
Memleket basshysy Qasym-Jomart Toqaev el Táýelsizdiginiń 30 jyldyq mereıtoıyna arnalǵan saltanatty jıynynda Táýelsizdiktiń otyz jylyn halqymyzdyń tarıhynda betburys bolǵan jasampazdyq dáýiri dep atady.
«Tarıhı ýaqyt ólshemimen qaraǵanda otyz jyl degen – qas-qaǵym sát. Al, ótken oqıǵalar turǵysynan baǵalasaq, ǵasyrlarǵa tatıtyn merzim. Qazaqstan halqy úshin bul – azattyq jylnamasynyń tutas dáýiri. Jarqyn bolashaǵymyzǵa jol salǵan uly jetistikter kezeńi. Endi Táýelsizdiktiń tórtinshi onjyldyǵyna qadam basqaly turmyz. Bul kezeń bizge jańa mindetter júkteıdi. Memlekettigimizdi odan ári nyǵaıtyp, halqymyzdyń ál-aýqatyn arttyra túsýimiz kerek. Sondyqtan, barlyq saladaǵy reformany mindetti túrde jalǵastyra beremiz. Eń bastysy, beıbit ómirdi, tynyshtyq pen turaqtylyqty saqtaı bilýimiz qajet. Sonda azamattarymyz Táýelsizdiktiń ıgiligin árdaıym sezinetin bolady. Bizdiń maqsatymyz – osy», - dedi Prezıdent.
Qazaqstandaǵy Táýelsizdik kúninde tutas el boıynsha saltanatty is-sharalar ótedi, áleýmettik nysandar iske qosylady. 2021 jyldyń basynan bergi kóptegen is-sharalar Táýelsizdik kúnine arnaldy. Sonymen birge, Prezıdent Aqordada elimizdiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi, belsendi qoǵamdyq qyzmeti úshin bir top azamatty memlekettik nagradalarmen marapattady jáne Qazaqstandy kórkeıtýge úles qosqan barlyq azamatqa rızashylyq bildirdi. Al 15 jeltoqsanda Nur-Sultannyń úsh núktesinde demeýshilik qarajat esebinen merekelik otshashý uıymdastyryldy.
«Damý jolymyzdy naqty nusqap turǵan strategıalyq maqsattarymyz bar. Elimiz óziniń sara jolynan aınymaı, alǵa qadam basa beredi. Biz úshin Táýelsizdik bárinen qymbat. Osy baǵa jetpes qundylyǵymyzdy qasterlep, qýatty Qazaqstandy damytý úshin bárimiz jumylyp, bir el bolyp aıanbaı eńbek eteıik. Jalpyulttyq mereıtoıymyz qutty bolsyn! Elimizdiń abyroıy asqaqtap, bedeli bıikteı bersin! Elbasymyz aman bolsyn! Qazaqstanymyz máńgi bolsyn!» - dep quttyqtady Qasym-Jomart Toqaev.