Ulystyń uly kúni Naýryz merekesiniń aýqymyn keńeıtý úshin tól jańa jyldy kún men tún teńelerden 10 kún buryn bastaý ádetke aınalyp keledi
Búgin Qazaqstannyń birneshe óńiri Kórisý kúnin atap ótedi, dep habarlaıdy Almaty-akshamy.kz QazAqparatqa silteme jasap.
Negizinen elimizdiń batys bóliginde atap ótiletin Kórisý kúni keıingi jyldary aqparattyq nasıhattyń áserinen aýqymyn keńeıtip keledi.
Mádenıettanýshylar men etnograftardyń aıtýynsha, bul kún negizi Batys Qazaqstan, Atyraý oblystarynda jáne Aqtóbeniń keıbir aýdandarynda, Reseıdiń kórshiles Astrahan, Saratov, Orynbor óńirlerinde, Qaraqalpaqstanda atalyp ótedi. Al Mańǵystaý óńiriniń jurty ony Amal merekesi dep te ataıdy.
Ulystyń uly kúni Naýryz merekesiniń aýqymyn keńeıtý úshin tól jańa jyldy kún men tún teńelerden 10 kún buryn bastaý ádetke aınalyp keledi. On kúndik dýmandy mazmundy etý aıasynda Kórisý kúni resmı sharalardyń qataryna qosylyp, búginde búkl qazaq biletin aıtýly kúnge aınalyp otyr.
Aty aıtyp turǵandaı, bul kún kóshpeli halyqtyń qystan aman shyqqanda bir-biriniń amandyǵyn surap, júz kórisetin kúni bolsa kerek. Sol eski ádetpen qazir de kórisý saltynyń ısharattary jańǵyra bastady. Tipti keı óńirlerde bul kúndi toılaý ǵuryptary jarapazan atrıbýttaryn eske salady. Úı-úıdi qydyryp júrgende kishkentaı balalarǵa analary shaǵyn dorba ustatyp qoıady. Bala qaı úıge kórisýge kirse, sol úıdiń dastarhanynan aýyz tıip, baýyrsaq, táttilerden salyp alady. Bul joralǵy jyl boıy balalarymyz toq júrsin, dastarhanymyz aralas bolsyn, qarym-qatynasymyzǵa syzat túspesin degen nıetten týǵan dep túsindiriledi.
Bir ereksheligi – Kórisý bir kúnmen shekteletin mereke emes, ol naýryzdyń 14-inen bastalyp, aıdyń sońyna deıin jalǵasa beredi.